Անցյալ ուրբաթ օրվանից ադրբեջանցի հակերները զանգվածային հարձակում են սկսել հայկական կայքերի վրա: Վնասվել են շատ կայքեր, մի մասը` պետական: Մնացածն այն կայքերն են, որոնք գրանցված են «.am» տիրույթում: Այս մասին «Արմատ» ակումբում կայացած մամուլի ասուլիսի ժամանակ լրագրողներին տեղեկացրեց «Smart Systems» ընկերության տնօրեն Ստեփան Ասլանյանը: Վերջինիս խոսքով` ադրբեջանցի հակերների ուղղվածությունը եղել է հենց «.am» տիրույթը, քանի որ իրենց ընկերության սերվերի վրա տեղադրված են մի շարք կայքեր, որոնք, թեպետ, հայկական են, բայց «.ru»-ով կամ «.com»-ով են վերջանում. դրանց ձեռք չեն տվել: «Կայք պատրաստող յուրաքանչյուր կազմակերպություն կամ անհատ պաշտպանական համակարգ ունի: Դրա համար մենք ստեղծել ենք հայկական կայքերի անվտանգության խումբ` երկու օր առաջ, որն արդեն 72 անդամ ունի: Այն պետք է փորձի մշակել ինչ-որ քաղաքականություն, թե ո՞նց է կարելի պայքարել հակերների դեմ ու մեծացնել կայքերի անվտանգությունը»,- ասաց նա: Հայ հակերները նույնպես հակահարվածներ են կատարում ադրբեջանական կայքերի վրա, սակայն, Ս. Ասլանյանի կարծիքով, դա լուծում չէ. առաջին հերթին պետք է լավ պաշտպանված լինենք: «Մեր խնդիրը մեր կայքերի որակի բարձրացումն ու անվտանգության մեծացումն է»,- ասաց նա: Վերջին մի քանի օրում ադրբեջանական երեք-չորս հակերային խմբեր են հայտնաբերել, որոնք միայն հայկական կայքեր չէ, որ կոտրում են: Հետաքրքիրն այն է, որ այդ հակերների մեծ մասը բացահայտ է գործում, չի թաքնվում: «Հայկական կայքեր կան, որոնք երեք տարեկան երեխան էլ կարող է կոտրել: Նույնն էլ ադրբեջանական կայքերի մասին կարելի է ասել: Ավելի ցավոտն այն է, որ կան հայկական պետական կայքեր, որ ուրբաթ օրվանից կոտրված են ու մինչ օրս չեն վերականգնվել, օրինակ` Էկոնոմիկայի նախարարության կայքը: Ցանկության դեպքում ցանկացած կայք կարելի է կոտրել, Պենտագոնի կայքն էլ են կոտրում: Այստեղ ավելի շատ խնդիրն այն է, թե ինչքան ժամանակում արձագանք կլինի: Պենտագոնի կայքը կոտրում են, մի քանի վայրկյան հետո վերականգնվում է»,- ասաց Ս. Ասլանյանը` նշելով, որ վերջին հարձակման ընթացքում իրենց հաճախորդներից շատերը նույնիսկ տեղյակ չեն եղել, որ իրենց կայքերը կոտրվել են, քանի որ ընդամենը մի քանի րոպեի ընթացքում ամեն ինչ վերականգնվել է: «Երկու ձև կա կայք կոտրելու: Առաջինը, երբ կայքի տեսքը փոփոխվում է` դրոշ են դնում, ինչ-որ տողեր են գրում կամ հղում են անում իրենց կայքին: Դա, բնականաբար, դուք կտեսնեք: Մյուսը, երբ վիրուս է տեղադրվում և վնասում ձեր համակարգիչը»,- ասաց Ս. Ասլանյանը: