Երեկ ԼՂՀ կառավարության նիստում հավանության արժանացավ կրթության եւ գիտության նախարար Վլադիկ Խաչատրյանի ներկայացված որոշման նախագիծը, որով հանրապետությունում նախատեսվում է բացել եւս 3 մանկապարտեզ. Ստեփանակերտի թիվ 3 մանկապարտեզը կունենա 4 խումբ` 110 երեխայի ընդգրկմամբ, Մարտունու թիվ 1 մանկապարտեզ կհաճախեն 160 երեխա, իսկ Մարտակերտի շրջանի Առաջաձոր գյուղի մանկապարտեզ` 30 երեխա: Կրթության նախարարի հավաստմամբ` մանկապարտեզների` մինչեւ տարեվերջ պահպանման ծախսերը կկատարվեն նախարարության որոշ ծրագրերի իրականացման ժամանակ տնտեսված գումարների հաշվին: Այսպիսով, պետական մանկապարտեզների թիվը հանրապետությունում հասավ 24-ի, այնինչ 2007-ին գործում էր ընդամենը 5 մանկապարտեզ: Տեղեկացնենք նաեւ, որ Ղարաբաղում կան նաեւ մասնավոր մանկապարտեզներ: Մանկապարտեզների ցանց ունեն Հայ ավետարանչական ընկերակցությունը եւ Հայ օգնության միությունը: