Դուքենդոյի (ֆուլկոնտակտ կարատեի) Արագածոտնի մասնաճյուղի մարզիկները հուլիսը   առանձնակի հաջողությունների  ամիս են համարում իրենց համար: Այդ ամսին նրանք Վրաստանում մասնակցեցին 2  մրցաշարի եւ, ընդհանուր առմամբ,  վերադարձան 19 չեմպիոնական մեդալով: Օրերս նրանք վերադարձել են Հայաստան և սկսել են պատրաստվել հաջորդ առաջնությանը:   Մարզիկներն առաջին հաջողությունն ունեցել են  Քոբուլեթի քաղաքում, ուր հուլիսի 26-ին  կայացավ  կարատեի միջազգային  առաջնությունը: Այստեղ Արագածոտնի մարզի  25 մարզիկներից 6-ը դարձան չեմպիոն` գրավելով առաջին տեղը: Առավել հաջողակ էր հուլիսի 28-29-ին   Ուռեկիում  կայացած   քինգբոքսինգի  աշխարհի ակումբային առաջնությունը: Մարզը ներկայացնող 22 կարատիստից այս մրցումներում չեմպիոնի կոչմանն արժանացան 13-ը: «Այս առաջնություններին մենք բավականին լուրջ էինք մոտեցել ու լավ էինք նախապատրաստվել: Այնպես որ հաջողությունները անսպասելի չէին»,-ասաց Դուքենդոյի Արագածոտնի մասնաճյուղի նախագահ Արայիկ Ավետիսյանը: Նրա ասելով` հավաքականի հաջողություններում իրենց ներդրումն ունեն նաեւ գլխավոր կազմակերպիչներ` մասնաճյուղի փոխնախագահ Տիգրան Հովհաննիսյանն ու ընդհանուր հավաքականի մարզիչ, 2007թ. աշխարհի գավաթակիր Արա Մեհրաբյանը: Առաջնությունից առաջ եւ հետո հավաքականին ընդունել է Արագածոտնի մարզպետ Սարգիս Սահակյանը: Նա խոստացել է այսուհետ աջակցել մարզիկներին` ինչով կկարողանա: Հաղթանակով վերադարձած մարզիկները ներկայումս լարված պարապում են: Նրանք պատրաստվում են նոյեմբեր ամսին Բաթումի քաղաքում կայանալիք միջազգային առաջնությանը: Մրցույթի նախաձեռնողներ Հայաստանի եւ Վրաստանի ֆեդերացիաներն են, իսկ մասնակցող երկրները 6-ն են` Հայաստանը, Վրաստանը, Ռուսաստանը, Իրանը, Թուրքիան եւ Ադրբեջանը: