Արագածոտնի մարզում երեկ տեղի ունեցած խարհրդակցության վերջում ելույթ ունեցան նաեւ ավագ դպրոցների տնօրենները: Աշտարակի թիվ 5 ավագ դպրոցի տնօրեն Ֆելիքս Հովհաննիսյանը հայտարարեց, թե իր դպրոցում կան 220 ավագ դասարանցիներ ու այդ թիվն իրեն անհանգստացնում է, քանի որ քաղաքում գործող քոլեջը աշակերտներ է «փախցնում»: Տնօրենն առաջարկեց ավագ դպրոցներում ներդնել անվտանգության խիստ համակարգ, քանի որ 200-ից ավել 10-րդ եւ բարձր դասարանցիների առկայությունը մի շենքում հղի է անցանկալի հետեւանքներով: «Հնարավոր է նաեւ դպրոց մտնեն կողմնակի մարդիկ, ինչն էլ ավելի մտահոգիչ է դառնում»,-ավելացրեց Ֆ. Հովհաննիսյանը: Ավելի համարձակ ելույթ ունեցավ Ապարան քաղաքի հատուկ դպրոցի տնօրեն Նվարդ Բարսեղյանը: Տնօրենի խոսքերով, այս տարվա շրջանավարտներն ընդամենը 44 են եւ դպրոցը որոշակի խնդիրների առաջ է կանգնել: «Ապարանում գործող ֆիզմաթ թեքումով քոլեջը միշը ընդունել է 7-8-րդ դասարանում սովորող աշակերտներին, սակայն այս տարի հայտարարություն է տվել, որ ընդունելություն է կազմակերպում առանց սահմանափակման` հումանիտար թեքումով: Ընդունենք` այդ 44 աշակերտից ավագ  դպրոց չեկան 4 աշակերտ, մի մասն էլ որոշեց, որ ուսումնարանում պետք է սովորի` բա մեր վիճակը ի՞նչ կլինի: Աշտարակի դպրոցի տնօրենը 220 աշակերտ ունի ու մտահոգվում է, ես չմտահոգվե՞մ: Բացի դրանից, վտանգվում է կառավարության որոշումը` ավագ դպրոցների մասին: Ես ուրախ եմ, որ քաղաքում ֆիզմաթ թեքումով քոլեջ կա, բայց քոլեջը ավագ դպրոց չէ եւ ծրագրային բականանաչափ տարբերություններ կան: Եթե այդպես պետք է լինի, ուրեմն կառավարության որոշումը վտանգի տակ է: Կամ թող ֆիզմաթ դպրոցը դառնա ավագ դպրոց եւ երեխաները գնան այնտեղ, կամ էլ թույլ տան մենք առաջին դասարան ընդունենք մեր աշխատանքները նորմալ կազմակերպելու համար»,-«Հետքի» հետ զրույցում ասաց Նվարդ Բարսեղյանը: Տիկին Բարսեղյանի խոսքերով` ավագ դպրոցների ստեղծման նպատակներից մեկն էլ աշակերտների կողմից կրկնուսույցների մոտ պարապելու երեւույթին վերջակետն դնելն է: «Մեր դպրոցի ոչ մի շրջանավարտ կրկնուսույցի մոտ չի պարապել, ու այս տարի բոլորն էլ ընդունվել են տարբեր բուհեր»,-ավելացրեց Ն. Բարսեղյանը: Խորհրդակցության ժամանակ Ապարանի ավագ դպրոցի տնօրենը մի քանի խոսք էլ ասաց ֆինանսական հոսքերի մասին: «Այս տարի, ինչպես գիտեք, գրեթե բոլոր դպրոցներում ֆինանսների հատկացումներըը կրճատեցին: Լավ արեցին, ճգնաժամ է, բայց շատ դպրոցների իմ գործընկերներն են խնդրել, որ այս հարցը փոխանցեմ: Բռնեցին միանգամից հախուռն կերպով ֆինանսական միջոցները կրճատեցին` առանց հաշվի առնելու` դպրոցը կարող է գոյատեւել, թե ոչ: Այս առումով մեր քաղաքի 1-ին եւ 2-րդ դպրոցները վառելիքի հետ կապված խնդիրներ կունենան եւ ջեռուցման սեզոնը նորմալ չեն կարողանա կազմակերպել»,-նշեց տնօրենը: Արագածոտնի մարզպետ Սարգիս Սահակյանն էլ հայտարարեց, որ դպրոցների ֆինանսական հատկացումները չեն նվազել եւ այդ գումարները ժամանակին կհատկացվեն: Տիկին Բարսեղյանի մեղադրանքների կապակցությամբ փորձեցինք պարզաբանում ստանալ նաեւ Ապարանի Ֆիզիկամաթեմատիկական քոլեջի տնօրեն Մանվել Պետրոսյանից: «Ես հիմա ոչ մի պարզաբանում էլ չեմ տա` հետո ձեզ ամեն ինչ կասեմ»,-ասաց Մ. Պետրոսյանը: Արագածոտնի մարզպետարանի Կրթության, մշակույթի եւ սպորտի վարչության պետ Սիրամարգ Ղուկասյանն էլ ասաց, որ ֆիզմատ քոլեջի տնօրենն իրավունք չունի հումանիտար առարկաների գծով ընդունելություն կազմակերպել, քանի որ իր կանոնադրությամբ նախատեսված չէ: Թալինի ավագ դպրոցի տնօրեն Հայկ Դիլանյանն էլ մտահոգված էր իր ղեկավարած դպրոցի շենքային անհարմարություններից: «Դպրոցի դասասենյակները նախատեսված են առավելագույնը 18 աշակերտի համար: Եթե այդ դասարաններում 18-ից ավել թվով աշակերտներ ընդունենք` կոպիտ ձեւով կխախտենք սանիտարական նորմերը: Հնացած են ֆիզիկայի եւ քիմիայի լաբորատորիաները: Բացի դա` չունենք նաեւ մարզասրահ եւ ֆիզկուլտուրա առարկան դժվարությամբ կպարապենք»,-ասաց տնօրենը: Պարոն Դիլանյանը քննադատեց նաեւ դպրոցներին աշակերտների թվով ֆինանսավորելու կարգը: «Աշակերտների թվով ֆինանսավորվելու դեպքում` դպրոցը կկանգնի լուրջ ֆինանսական խնդիրների առջեւ: Կրթության նախարարությունը պետք է դա հաշվի առնի, որպեսզի ուսուցումը նորմալ կազմակերպվի»,-ավելացրեց տնօրենը: Դպրոցի տնօրենները մի շարք խնդիրների մասին գրավոր ներկայացրեցին Արագածոտնի մարզպետարանի Կրթության, մշակույթի եւ սպորտի վարչության պետ Սիրամարգ Ղուկասյանին: Նշենք, որ տիկին Ղուկասյանն ամեն ինչ արեց, որպեսզի տնօրեննների գրավոր բողոքները իմ ձեռքը չընկնեն: Երբ վարչության պետին խնդրենցի գրավոր դժգոհությունները տրամադրել նաեւ մեզ, առանց պատասխանելու հարցիս` իմ կողքից հեռանում էր: Բազմիցս նրան  «անհանգստացնելուց» հետո վերջապես Ս. Ղուկասյանը հայտարարեց, որ դրանք ինձ չի տրամադրի, քանի որ «դեռ պետք է բողոքները մշակվեն»: Ինչեւէ, բոլոր զեկույցները լսեց եւ մեկ առ մեկ դրի առավ Կրթության ազգային ինստիտուտի տնօրեն Նորայր Ղուկասյանը, իհարկե` տնօրենները հույս չունեին, որ շատ հարցեր կլուծվեն: