Հայաստանի պետական տնտեսագիտական համալսարանը այս տարի նոր թեսթային համակարգով է սկսելու ուսումնական տարին: Ըստ ՀՊՏՀ ռեկտոր Յուրի Սուվարյանի` այս քայլը կոռուպցիան հաղթահարելու հրաշալի ձեւ է: «Բոլորս էլ գիտենք, որ բանավոր քննություններին կոռուպցիան եւ անարդարությունները ավելի մեծ տեղ կարող են զբաղեցնել, քան գրավոր համակարգչայնացված թեսթային համակարգով մշակված քննություններին»,-այսօր լրագրողների հետ հանդիպման ժամանակ ասաց Յուրի Սուվարյանը: Սուվարյանը չհամաձայնեց լրագրողների այն դիտարկմանը, որ Տնտեսագիտական համալսարանը Հայաստանի ամենակոռումպացված համալսարանների շարքին է դասվում: «Ես չեմ բացառում, որ կոռուպցիայի դեպքեր կան մեր կառույցում, բայց դրանք այն չափերի չեն հասնում, որ մեր համալսարանը դասվի այդ կոռումպացված բուհերի շարքին: Բոլորը գիտեն, որ ինձ վրա ներազդելը անհնար է, եւ ոչ ոք չի կարող ինձ մոտ բարեխոսել, կամ կաշառք առաջարկել»,-ասաց նա: Այսօր ՀՊՏՀ-ն մրցակցում է ոչ միայն հայաստանյան պետական եւ մասնավոր բուհերի այլ նաեւ արտասահմանյան բուհերի հետ, քանի որ, ըստ Յ. Սուվարյանի, այսօր ուսանողներն ավելի շատ նախընտրում են ուսում ստանալ արտերկրում: Այս տարի ՀՊՏՀ ընդունվել են 1393 դիմորդ: «Ամենից շատ մրցունակ են եղել Ֆինանսներ եւ վարկ, Կառավարում, Մարքեթինգ ֆակուլտետները, որտեղ մեկ տեղի համար պայքարում էին 3-4 դիմորդ»,-նշեց ռեկտորը: Յուրի Սուվարյանը տեղեկացրեց, որ իրենց համալսարանի վարձավճարների մեջ փոփոխություններ չեն գրանցվել: Անդրադառնալով ֆինանսատնտեսական ճգնաժամին՝ տնտեսագիտական համալսարանի ռեկտորը հավելեց, որ տնտեսական ճգնաժամը հաղթահարվում է եւ արդեն 2010 թվականին կգրանցվի տնտեսական աճ ամբողջ աշխարհի մասշտաբով: