ԼՂՀ Սահմանադրության ընդունումից հետո Գերագույն դատարանն ունեցավ վճռաբեկ եւ սահմանադրական պալատներ: Սահմանադրական պալատ դիմելու հնարավորություն քաղաքացիները ստացան այս տարվա հուլիսի 1-ից: Ինչպես «Հետքին» տեղեկացրել է Գերագույն դատարանի նախագահ Արարատ Դանիելյանը, առ այսօր Սահմանադրական պալատ քաղաքացիները չեն դիմել, ինչը ԳԴ նախագահը պայմանավորում է նրանով, որ պալատը դեռ նոր է սկսել գործել եւ ոչ բոլորն են տեղյակ դրա մասին: Վճռաբեկ բողոքների մեջ, Արարատ Դանիելյանի հավաստմամբ, հղումներ կան Սահմանադրության վրա` ինչ-ինչ հոդվածի կամ սահմանադրական իրավունքի խախտման հետ կապված, սակայն զարմանալիորեն քաղաքացիները չեն դիմում Սահմանադրական պալատ: Գերագույն Դատարանի նախագահի խոսքերով, քաղաքացին իրավունք ունի դիմել սահմանադրական պալատ այն դեպքում, երբ բոլոր դատական պաշտպանության հնարավորությունները սպառված են, եւ նա դիմում է դատարան` ոչ թե վիճարկելու դատարանի որոշումը, այլ դատարանի` որոշում կայացնելիս կիրառվող օրենքների դրույթների սահմանադրական լինելը: Նման հարցով մինչեւ հուլիսի 1-ը Գերագույն դատարան է դիմել Մարդու իրավունքների պաշտպանը /ինչի իրավունքն օրենսդրությամբ ունի/` «Սոցիալական ապահովության քարտերի մասին» օրենքի 11-րդ հոդվածի 2-րդ մասը հակասահմանադրական ճանաչելու պահանջով: «Հունիսի 30-ին Գերագույն դատարանն այդ հարցով նիստ է հրավիրել եւ գործը քննել, որի արդյունքում որոշվել է դիմումը բավարարել: Օրենքն իրարամերժ դրույթներ է պարունակում. մի հոդվածում ասվում է, որ քաղաքացին պարտավոր է սոցիալական քարտ ստանալ, իսկ մյուսում էլ ասվում է, որ քաղաքացին իրավունք ունի»,-նշել է Ա.Դանիելյանը, ով պարզաբանել է, որ քաղաքացին պարտավոր չէ քարտ ունենալ եւ այդ հարցում մարդու կամքին չպետք է բռնանալ: Ստացվում է, որ վերոնշյալ դրույթը հակասահմանադրական է ճանաչվել, ինչը նշանակում է, որ այն իրավաբանական ուժ չունի: Գերագույն Դատարանը համապատասխան որոշումը հրապարակելուց հետո եռօրյա ժամկետում ուղարկում է հանրապետության նախագահին, Ազգային ժողովին, կառավարությանը, Գլխավոր դատախազին եւ Մարդու իրավունքների պաշտպանին: