Հաշմանդամություն ունեցող մարդիկ այսուհետ կարող են հեշտությամբ աշխատանք գտնել տանը նստած` համակարգչի օգնությամբ: «Ունիսոն» հասարակական կազմակերպությունը ստեղծել է www.jobs.disability.am կայքը, որը նախատեսված  է աշխատանք փնտրող սահմանափակ հնարավորություններ ունեցող մարդկանց աջակցելու նպատակով: Այսօր կայացավ կայքի շնորհանդեսը: Այն նախատեսված է միայն հաշմանդամություն ունեցող տարբեր տարիքային խմբի մարդկանց համար: Կայքը պարունակում է օգտակար խորհուրդներ աշխատանքի որոնման, հարցազրույց տալու, ռեզյումե լրացնելու վերաբերյալ: Կայքում տեղ են գտել նաեւ ոլորտը կարգավորող իրավական ակտերի համառոտ վերլուծությունը: Որոնման հնարավորության շնորհիվ գործատուները հեշտությամբ կարող են գտնել իրենց պահանջներին համապատասխան կայքում գրանցված հաշմանդամ աշխատողին: «Ունիսոն» հ/կ նախագահ Արմեն Ալավերդյանի հավաստմամբ, որոշ խոշոր ընկերություններ արդեն պաշտոնապես ցանկություն են հայտնել հաշմանդամություն ունեցող անձանց աշխատանքի ընդունելու. «Viva cell»-ն արդեն ընդունել է եւ շարունակում է ընդունել հաշմանդամ մարդկանց, «Orange telecom»-ը, «Icon comunications»-ը եւ էլի այլ կազմակերպություններ նույնպես ռազմավարություն են մշակել` այս մարդկանց աշխատանքի ընդունելու»: Արմեն Ալավերդյանը հաշմանդամության զբաղվածության հարցերում ամենագլխավոր խնդիրը համարում է կարծրատիպերի հաղթահարումը. «Այսօր 170 հազար գրանցված հաշմանդամներ ունենք, որոնցից 105 հազարը աշխատունակ տարիքի են: Խնդիրն այստեղ կարծրատիպերն են, թե հաշմանդամություն ունեցող մարդը հաճախ է հիվանդանում կամ շուտ է հոգնում... ձեռքը կտրված մարդը դժվար թե ավելի հաճախ հիվանդանա գրիպով, քան ոչ հաշմանդամը»: Այն, որ շատ գործատուներ բողոքում են, թե հաշմանդամ-աշխատողի համապատասխան պայմաններ ստեղծելու համար հսկայական ծախսեր են անհրաժեշտ, Արմեն Ալավերդյանը նույնպես կարծրատիպ է համարում. «Այո, ծախսեր կան, մանավանդ, եթե սայլակով շարժվող աշխատող ունես, սակայն այդ ծախսերը հսկայական չեն: Հաշմանդամ մարդիկ իրենք էլ հարմարվող են: Նրանց համար կարելի է միայն մինիմալ պայմաններ ստեղծել, ինչը մեծ գումարներ չի պահանջում»: ՀՀ ոլորտը կարգավորող իրավական ակտերը նախատեսել են որոշ արտոնություններ գործատուների եւ հաշմանդամություն ունեցող աշխատողների համար: Աշխատանքի եւ սոցիալական հարցերի նախարարությունը վճարում է հաշմանդամություն ունեցող աշխատողի աշխատավարձի 50%-ը, որը, սակայն, չի գերազանցում ամսական նվազագույն աշխատավարձի չափը` մոտ 30.000 դրամը: «Շահութահարկի մասին» ՀՀ օրենքի 38 հոդվա­ծով հաշմանդամ աշխատողներ ունեցող գործատուին տրվում են լուրջ հարկային արտոնություններ: Ինչ վերաբերում է հաշմանդամ աշխատողի արտոնություններին, դրանք հիմնականում թեթեւ արտոնություններ են, ինչպիսին օրինակ. աշխատանքի ընդունելիս՝ հաշմանդամների համար փորձա­շրջան չի սահման­վում: Արմեն Ալավերդյանը գտնում է, որ հաշմանդամություն ունեցող աշխատողի համար մեծ արտոնություններ սահմանելը սխալ կլիներ. «Պետք չէ մեծ արտոնություններով վախեցնել գործատուին: Հաշմանդամ մարդն էլ աշխատունակ է եւ կարող է որակյալ աշխատանք կատարել»: «Ունիսոն» հկ նախագահը նաեւ կոչ է անում բոլոր հաշմանդամություն ունեցող մարդկանց գրանցվել www.jobs.disability.am կայքում եւ ապացուցել, որ հաշմանդամ մարդն էլ կարող է լինել ֆինանսապես անկախ եւ պաշտպանել իր իրավունքները: Անի Հովհաննիսյան