Այսօր ԼՂՀ զոհված ազատամարտիկների թանգարանում տեղի ունեցավ Հայաստանի հանրային ռադիոյի խմբագիր, «Ապրելու բանաձեւը» հաղորդաշարի հեղինակ, Արցախյան պատերազմում զոհված ազատամարտիկի մայր Գոհար Մարտիկյանի «Ապրելու բանաձեւը» գրքի շնորհանդեսը, որը նախաձեռնել է ԼՂՀ մշակույթի եւ երիտասարդության հարցերի նախարարությունը: Շնորհանդեսին ներկա էին մշակույթի եւ երիտասարդության հարցերի նախարար Նարինե Աղաբալյանը, նախարարության աշխատակիցներ, զոհված ազատամարտիկների հարազատներ, հյուրեր: Ներկաների գնահատականը մեկն էր` մեր ազատամարտի հերոսների մասին գրվող նման գրքերը շատ կարեւոր են` ինչպես պատմության, այնպես էլ բանակի մարտունակության համար, քանի որ հենց նրանց սխրագործություններն են ոգեշնչում մեր զինվորներին, ովքեր պատրաստ են պաշտպանել հերոսների արյան գնով ազատագրված հայրենիքը: «Գիրքը ոչ թե լալկան մի մատենաշար է, այլեւ` հերոսապատում»,-այսպես է բնութագրում իր հեղինակած գրքերը Գոհար Մարտիկյանը, ով, ինչպես ինքն է խոստովանում, գրել է «գրիչը թաթախելով իր արնածոր սրտի մեջ»: Զոհված ազատամարտիկի այրի Լյուդմիլա Գրիգորյանը, ողջունելով գրքի լույս ընծայումը, միտքը շարունակեց` անդրադառնալով ղարաբաղյան կարգավորման շուրջ վերջին զարգացումներին. «Ով ուզում է կարգավորման փաստաթղթի տակ ստորագրի` թող մտնի այս թանգարանը եւ նայի այս տղաների աչքերին, ովքեր Արցախը մեզ են կտակել, որ պահպանենք»: Ըստ նրա, անընդունելի է, որ պատերազմում հաղթանակած երկիրն այժմ, կարծես թե, տանուլ է տալիս խաղաղ բանակցություններում: «Ինչ պատասխան պետք է տանք մեր այս տղաներին»,-հարցնում է նա: «Ապրելու բանաձեւը» գրքի մի քանի հատորների հեղինակ Գոհար Մարտիկյանը շնորհանդեսի ժամանակ տեղեկացրեց նաեւ, որ արդեն պատրաստ են գրքի մյուս երկու հատորները, եւ հովանավորների առկայության դեպքում դրանք էլ կտպագրվեն: