«Շատ ժողովուրդների պես արցախցիները եւս ստիպված եղան իրենց երկրի անկախությունն ու ազատությունը սրբագործել սեփական արյամբ` տանելով ավելի քան երեքամյա պատերազմի դժնդակ ծանրությունը, որ չափվեց, նախեւառաջ, հազարավոր հայորդիների զոհաբերված կյանքով: Մեր հանրապետության անկախությունը չափազանց թանկ գին ունի, ինչը բոլորիս թելադրում է մեծագույն նվիրումով ու խնամքով պահպանել այն, որ կոչվում է Լեռնային Ղարաբաղի (Արցախի) Հանրապետություն»,-նշվում է Հանրապետության օրվա առթիվ ԼՂՀ վարչապետ Արա Հարությունյանի շնորհավորական ուղերձում: Վարչապետն ուղերձում արտահայտում է իր համոզմունքն առ այն, որ կգա օրը եւ միջազգային հանրությունը սպասված հարգանքը կմատուցի Արցախին` ճանաչելով նրա անկախությունը: «Անկախ աշխարհի վերաբերմունքից` ներկայիս մեր գերխնդիրն է ամբողջ ներուժով զարգացնել եւ ամրապնդել մեր հանրապետությունը, զորացնել նրան տնտեսապես ու սոցիալապես, ժողովրդավարական ինստիտուտներով եւ քաղաքացիական հասարակությամբ: Մենք չպետք է մոռանանք, որ Արցախը շարունակում է թիրախ մնալ մեր հակառակորդի եւ թշնամաբար տրամադրված այլ ուժերի համար, ուստի հարկ է, միաժամանակ, պետական-հասարակական հնարավորությունները ուղղորդել հաղթական մարտերով կոփված մեր բանակի մարտունակությունը ուժեղացնելու նպատակակետի վրա: Մեր կառավարությունը խորապես գիտակցում է այդ խնդիրները, եւ իր ամենօրյա գործունեության մեջ առաջնային տեղ է հատկացնում դրանց կարգավորմանը` կիրառելով նոր ռեսուրսներ ու մտահղացումներ: Մենք պարտավոր ենք հաջողությամբ  հաղթահարել ներկա ժամանակափուլը,  երբ խորացած համաշխարհային տնտեսական  ճգնաժամը լուրջ խոչընդոտներ է  հարուցում բոլորի, նաեւ մեր առաջ, իսկ ղարաբաղյան կարգավորման գործընթացը մեզ համար դեռեւս անհրաժեշտ ապահովություն չի կանխանշում»,-ասվում է ուղերձում: