ՀՀ վերքաննիչ քրեական դատարանի նախագահ Տիգրան Սահակյանը Հայաստանի Հանրապետության ամենաբարձր վճարվող պետական պաշտոնյան է: Սահակյանը որպես աշխատավարձ ստանում է ամսական 1 մլն 425 հազար դրամ: Այս աշխատավարձը կազմված է 3 կոմպոնենտից՝ ՀՀ վերաքննիչ դատարանի քրեական պալատի նախագահի դրույքաչափ, ՀՀ վերաքննիչ դատարանի դատավորի դրույքաչափ, աշխատանքային ստաժի հավելավճար:

Ամենաբարձր վճարվող պետական պաշտոնյաների երկրորդ հորիզոնականում Վճռաբեկ դատարանի նախագահ Արման Մկրտումյանն է, որը նույն սկզբունքով ամսական ստանում է 1 մլն 360 հազար դրամ աշխատավարձ:

Երրորդ հորիզոնականում Կենտրոնական բանկի նախագահ Արթուր Ջավադյանն է, որի ամսական աշխատավարձը կազմում է 1 մլն 345 հազար դրամ:

ՀՀ քաղաքացիական վերաքննիչ դատարանի նախագահ Անատոլի Մաթևոսյանը ամենաբարձր վճարվող պետական պաշտոնյաների ցանկում չորրորդն է՝ 1 մլն 300 հազար դրամ աշխատավարձով:

Հինգերորդ տեղում Սահմանադրական դատարանի նախագահ Գագիկ Հարությունյանն է՝ 1 մլն 190 հազար դրամ աշխատավարձով:

ՀՀ գլխավոր դատախազ Աղվան Հովսեփյանը եզրափակում է առաջին վեցյակը՝ 1 մլն 176 հազար դրամ աշխատավարձով:

Վերը բերվածը այսպես կոչված «կեղտոտ» աշխատավարձն է, այսինքն՝ հարկային պարտադիր պահումները հաշվարկված չեն. «մաքուր» աշխատավարձը, բնականաբար, ավելի քիչ է: