Մեր նախորդ համարներից մեկում արդեն անդրադարձել էինք Արմավիրի մարզի Երասխահուն գյուղի բնակիչների դժգոհությանը: Հիշեցնենք, որ երասխահունցիներն իրենց գյուղմթերքն իրացնում են գյուղի ճամփեզրին, ինչին համաձայն չէ Արմավիրի մարզպետ Աշոտ Ղահրամանյանը: Արդեն մի քանի օր է ոստիկանները ստիպում են գյուղացիներին, որպեսզի նրանք իրենց առեւտուրն անեն Ջրառատ գյուղի տարածքում բացված շուկայում, որը գյուղացիների ասելով, պատկանում է  ԶՈՒ 3-րդ կորպուսի հրամանատար, գեներալ Լեւոն Երանոսյանին ու Ջրառատի գյուղապետ  Գարեգին Հովհաննիսյանին: Երասխահունցիների ասելով, այդ շուկայում «փայ» ունի նաեւ մարզպետ Աշոտ Ղահրամանյանը: Նշենք, որ Գ. Հովհաննիսյանը հաստատեց, որ շուկան իրենն է, իսկ Արմավիրի մարզպետը` ոչ (Տես`«Երասխահունի գյուղացիները պատրաստվում են բողոքի ակցիաներ կազմակերպել»): Արդեն 2-3 օր է գյուղացիները ոստիկանների ճնշմամբ, այլեւս առեւտուր չեն  անում փողոցում: Երասխահունցիներն այս անգամ տեղափոխվել են գյուղի գլխավոր ճանապարհների խաչմերուկներ, սակայն այնտեղ էլ ոստիկանները հանգիստ չեն տալիս գյուղացիներին: Ոստիկանների պահանջը մեկն է` ամեն գնով գյուղացիներին տեղափոխել Ջրառատի շուկա: «Ժողովուրդը կանգնել է ոտքի ու չի ցանկանում գնալ Ջրառատի շուկա, թող ջրառատցիները գնան իրենց տարածք, մենք չենք գնա: Էդ տարածքը մերն է ու մենք մեր գյուղի տարածքից դուրս չենք գա»,-«Հետք»-ին փոխանցեց երասխահունցի Գուրգեն Սամսոնյանը: Գուրգենի համագյուղացի Սայադն էլ ասաց, որ գրեթե ամեն օր ոստիկանները գալիս են գյուղ եւ սպառնում են գյուղացիներին: Նա մեզ պատմեց, որ ոստիկանների կողմից ձեռնարկած «օպերացիան» ուժեղ է եղել հատկապես սեպտեմբերի 3-ի լուսադեմին` ժամը 5-6-ի սահմաններում: «Միլիցեքն ընենց շուխուռ էին դրել ու բարձրախոսներով ընենց էին գոռգոռում, որ ամբողջ գյուղը վախից արթնացել էր: Ես էլ եմ քնից զարթնել: Շուկայում գտնվող մարդիկ ինձ պատմում էին, որ միլիցեքը եկել էին 5-6 մեքենաներով: Մարդկանց կեսը վախից փախել էր, մի մասն էլ շարունակել էր առեւտուր անել: Ասեմ, որ ժողովուրդը շատ ահաբեկված է: Էդ հիմա են ասում, որ շուկան անվճար է տրվելու գյուղացիներին, բայց դրա դառը փորձն ունենք եւ մեկ շաբաթ հետո կսկսեն մեզանից փող վեկալել,-ասաց Սայդն ու հավելեց: -Ուրախությամբ ձեզ ասեմ, որ Երասխանուն ժամանած առաջին մոնղոլ-թաթարական արշավանքը ձախողվեց»: Սայադից հետաքրքրվեցինք, արդյո՞ք գյուղացիները չեն պատրաստվում իրենց դժգոհությունները նամակով արտահայտել կառավարությանը: «Ում դիմենք, այս հարցը մարզպետի լուծելիք հարցն է, եթե նա չի լուծում նշանակում է վերեւներում ամեն ինչ որոշված է: Հետո էլ, մարդիկ շատ վախեցած են: Գիտեն, եթե բողոքեն կարող է իրենց համար վատ լինի»,-ավելացրեց Սայադը: Մեկ այլ երասխահունցի էլ հայտարարեց, որ սեպտեմբերի 3-ին ոստիկաններն ամեն ինչ արել են, որպեսզի գյուղացիները կռիվ անեն ու նրանց ձերբակալեն: Ջրառատի գյուղապետ Գարեգին Հովհաննիսյանն ասում է, որ շուկան գյուղացիներին տրամադրվում է անվճար «միայն թե փողոցում առեւտուր չանեն»: