Քիչ առաջ «Ժառանգություն» կուսակցության գրասենյակի դիմաց էին հավաքվել Կենտրոնական ընտրական հանձնաժողովի անդամ Զոյա Թադեւոսյանը, կուսակցության համամասնական ցուցակում Արմեն Մարտիրոսյանին հաջորդող Մովսես Արիստակեսյանը եւ կուսակցության տասից ավելի ակտիվիստներ: Վերջիններս զայրացած էին «Ժառանգության» վարչության երեկվա նիստում կայացրած որոշումներից, որոնց արդյունքում կուսակցությունից հեռացվել են 6 անդամներ, այդ թվում` Զոյա Թադեւոսյանն ու ԱԺ պատգամավոր Վարդան Խաչատրյանը:

Զոյա Թադեւոսյանը «Հետքի» հետ զրույցում ասաց, որ կուսակցության պառակտման պատճառը ֆինանսական ճգնաժամն է. «Կուսակցությունը ֆինանսավորում չունի ճգնաժամի պատճառով, դրա համար էլ հիմա «Ժառանգությունը» աճուրդի կհանեն այն 7 մարդիկ, որոնք երեկ վարչության նիստ են արել»:

Մովսես Արիստակեսյանն էլ «Հետքին» հայտնեց, որ թեեւ ինքը նախկինում կասկածում էր, սակայն այժմ վստահ է, որ վերցնելու է պատգամավորական մանդատը եւ աշխատելու է խորհրդարանում:

«Ժառանգության» խորհրդի անդամ Անուշ Ղարիբյանը մեզ հետ զրույցում ասաց, որ իրենք պայքարում են իշխանական ընտրակեղծարարների դեմ, սակայն իրենց կուսակցության ներսում էլ են կեղծիքներ կատարվում:

«Ես այս կուսակցությանն եմ անդամագրվել, որովհետեւ սիրում եւ հարգում եմ Րաֆֆի Հովհաննիսյանին, նա պետք է ղեկավարի «Ժառանգությունը» եւ ոչ թե ֆիզկուլտինստիտուտն ավարտած Արմեն Մարտիրոսյանը»,- ասաց Անուշ Ղարիբյանը:

Կուսակցության ակտիվիստները դեռեւս պետք է քննարկեն իրենց հետագա քայլերը եւ որոշեն` դուրս գալ «Ժառանգությունից», թե պահանջել վարչության անդամների հրաժարականը: