Սակայն մարզիկներն ասում են, որ ռինգում պատրաստ են մենամարտել անգամ հարազատ եղբոր դեմ

Սեպտեմբերի 12-ին Սևանա լճի «Մայամի» հանգստյան համալիրում անցկացվեց «Մենամարտ առանց կանոնների»` ARMFC 7-րդ մրցաշարը:

«Այս մրցաշարը համարվում է ARMFC վարկանիշային մրցաշար: Մեր նպատակն է, որ մեր մրցաշարերի շնորհիվ 38-40 երկրի հաղթահարենք, որպեսզի այս ARMFC վարկանիշային մրցաշարը համարվի աշխարհի առաջնություն: Իսկ այսօր այն համարվում է միջազգային մրցաշար»,- «Հետքի» հետ զրույցի ժամանակ ասաց ARMFC մրցաշարի կազմակերպիչ, «Արմֆայթինգ» պրոֆեսիոնալ ֆեդերացիայի նախագահ, միջազգային կարգի մրցավար Հայկ Ղուկասյանը: Սեպտեմբերի 12-ին մենամարտեց 6 զույգ: Առաջին անգամ Հայաստանում մենամարտեցին նաև աղջիկները: Մենամարտը տևում է 3 ռաունդ` յուրաքանչյուրը 3 րոպե տևողությամբ: Յուրաքանչյուր ռաունդից հետո կա ընդմիջում` 1 րոպե տևողությամբ: Մրցավարական կազմում էին ARMFC մրցաշարի գլխավոր մրցավար, «Արմֆայթինգ» պրոֆեսիոնալ ֆեդերացիայի Արմավիրի մարզի նախագահ Շանթ Պետրոսյանը և ARMFC կարգի ռինգի մրցավար, քիք բոքսինգի աշխարհի եռակի չեմպիոն Արթուր Թադևոսյանը: 19-ամյա Տարոն Պետրոսյանի և 20-ամյա Արամ Ղազարյանի մենամարտում հաղթող ճանաչվեց Արամ Ղազարյանը: 25-ամյա Լևոն Խուբեսերյանի և 24-ամյա Սարգիս Ստեփանյանի մենամարտում հաղթեց Սարգիս Ստեփանյանը: Մինչ մենամարտը պատասխանելով «Հետքի» հարցին, թե «արդյոք իրեն չի՞ կաշկանդում այն, որ մենամարտելու է ընկերջ հետ»` վանաձորցի Սարգիսն ասաց. «Ռինգում նույնիսկ հարազատ եղբոր հետ մենամարտը պիտի անես: Նույնիսկ հարազատ եղբայրդ լինի: Դա սպորտաձև է»: ARMFC բազմակի չեմպիոն, 22-ամյա Վաչիկ Ավետիսյանի և ARMFC բազմակի չեմպիոն, 22-ամյա Սասուն Բաղդասարյանի մենամարտում հաղթեց Սասուն Բաղդասարյանը: Մենամարտից անմիջապես հետո հանդիսատեսին ուղղված խոսքում Վաչիկ Ավետիսյանն ասաց. «Ես մենամարտից առաջ Սասուն եղբորն ասեցի, որ ով ուժեղ է, թող նա էլ հաղթի: Ես իրան լավ ճանաչում եմ, լավ մարզիկ է»: 2009 թ. մարտական կոխի Հայաստանի չեմպիոն, 18-ամյա Արթուր Աղաջանյանի և 18-ամյա Հովհաննես Մելիքյանի մենամարտում տեխնիկական նոկ աուտով հաղթեց Հովհաննես Մելիքյանը: ՀՀ ջիու-ջիթսուի չեմպիոն, Ռուսաստանի ձեռնամարտերի չեմպիոն, 30-ամյա Վլադիմիր Հակոբյանի և 28-ամյա Աշոտ Շահինյանի մենամարտը, միավորների հավասար լինելու պատճառով, ավարտվեց ոչ-ոքի: Մենամարտից առաջ Վլադիմիր Հակոբյանը «Հետքին» ասել էր, որ սպորտում նշանակություն չունի, որ մրցելու է ընկերոջ հետ: Իսկ Աշոտ Շահինյանը նշել էր. «Ռինգից դուրս մենք բոլորս էլ ընկերներ ենք»: «Կնոջ հմայքը, պարզվում է, ոչ միայն գեղեցկության, այլև տվյալ պարագայում նաև ուժի մեջ է»,- աղջիկների մենամարտից առաջ ասաց մրցավարը: 19-ամյա Վարդուհի Թելալյանի և 24-ամյա Ելենա Խաչատրյանի մենամարտն ավարտվեց հենց առաջին ռաունդում: Պարանոցի խեղդում հնարքով հաղթեց Ելենա Խաչատրյանը: «Մենամարտ առանց կանոնների» մրցաշարի մարզիկներին պարգևատրեցին Հայկ Ղուկասյանը, գեներալ-մայոր Արկադի Տեր-Թադևոսյանը (Կոմանդոսը), «Մարտական ձյուդո» ֆեդերացիայի նախագահ Միքայել Բադալյանը և այլք: Ինչպես «Հետքին» ասաց «Արմֆայթինգ» պրոֆեսիոնալ ֆեդերացիայի նախագահ Հայկ Ղուկասյանը, «մարտեր առանց կանոնների» անվանումը մնացել է հին ժամանակներից, երբ անցկացվող մարտերն, իրոք, առանց կանոնների էին: Իսկ ներկայումս այս մենամարտերն ունեն իրենց կանոնները: Արգելված են հարվածները` ծոծրակին, վահանագեղձին, ողնաշարին, ինչպես նաև մարդու կյանքին վտանգ սպառնացող մի շարք այլ հարվածներ: Կա նաև մրցավար, և սահմանված է մենամարտի որոշակի տևողություն: Հայկ Ղուկասյանը նշեց, որ օգոստոսի 21-ին իրենք Դոնի Ռոստով քաղաքում մասնակցեցին ԱՊՀ երկրների համագործակցության միջազգային մեծ մրցաշարին, որտեղ հայ 5 մարզիկներից 2-ը` Մովսես Շահինյանն ու Նվեր Մեսրոպյանը, հաղթող ճանաչվեցին: «Մովսես Շահինյանը 1 րոպեի ընթացքում նոկ աուտի ենթարկեց ռուս մարզիկին, որը չուներ ընդհանրապես պարտություն, Նվեր Մեսրոպյանը 1 րոպեի ընթացքում խեղդում հնարքով ճանաչվեց հաղթող»,- ասաց Հայկ Ղուկասյանը: Նա տեղեկացրեց, որ սեպտեմբերի 17-ին իրենք կմեկնեն Ուկրաինա, որտեղ անցկացվելու են ընդհանուր մենամարտերի մրցաշարեր: Հայ մարզիկներից 70 կգ քաշային կարգում կմենամարտի Վլադիմիր Սիմոնյանը, իսկ 84 կգ քաշային կարգում` Մովսես Շահինյանը: Հայկ Ղուկասյան նշեց նաև, որ նոյեմբերին Երևանում տեղի կունենան «Հայաստանը ընդդեմ Վրաստանի»` 5 ուժեղագույն մարզիկների մենամարտեր: «2005 օգոստոսին Հայաստանում ես վերածնունդ տվեցի ընդհանուր մենամարտերին` անվանումը դնելով armfighting (թարգմանաբար նշանակում է հայկական մենամարտեր) և փորձեցի հիշեցնել մ.թ.ա. մեր հայ թագավորների հաղթանակները: Տրդատ առաջին թագավորը Ներոն կայսեր կողմից կազմակերպված հասարակական խաղերի ժամանակ ընդհանուր մենամարտերից դարձել է հաղթող: Վարազդատ թագավորը մ.թ. 385 275-րդ Օլիմպիական խաղերում դարձել է հաղթող»,- ասաց Հայկ Ղուկասյանը: