Պատրաստվում են Վերջին մեկուկես տարում Հայաստանում տեղի ունեցած քաղաքական դատավարությունների ընթացքում ԵԱՀԿ դիտորդները իրականացրել են դիտորդական առաքելություն, որի արդյունքում կազմված զեկույցի հրապարակումը նախատեսված է հոկտեմբերին: Զեկույցն արդեն պատրաստ է, և ըստ թերթի աղբյուրների, ՀՀ իշխանություններն արդեն իսկ տեղեկացված են, որ ԵԱՀԿ դիտորդները քաղաքական դատավարությունների ընթացքում տեղի ունեցած խայտառակ խախտումների մեծ մասն արձանագրել են: Ուստի ներկայումս ՀՀ իշխանությունները պատրաստվում են այդ զեկույցի հրապարակմանը: «Մարտի 1-ի» գործով քաղբանտրակյալ Արմեն Սարգսյանին վճռաբեկ դատարանի կողմից արդարացնելը հենց այս զեկույցի հետ է կապվում. ուզում են ցույց տալ, որ ՀՀ դատարանները նաև արդար և անկախ են լինում: Ի դեպ, Սարգսյանի փաստաբան Ինեսա Պետրոսյանը թերթին փոխանցել է, որ պատրաստվում է դատական կարգով փոխհատուցում պահանջել իր պաշտպանյալին մոտ 560 օր անազատության մեջ պահելու դիմաց: Եվրադատարանի նախադեպերով, կալանքի մեկ օրը 200-ին 300 եվրոյի չափով է հաշվարկվում: Մեկնել է բուժման «Հայկական ժամանակի» տեղեկություններով` ԱԺ պատգամավոր Խաչատուր Սուքիասյանը երեկ մեկնել է արտերկիր` բուժման նպատակով: Ըստ թերթի աղբյուրների` Սուքիասյանը մեկնել է Գերմանիա, որտեղ նա պետք է բժշկական ստուգման ենթարկվի, այնուհետև` վիրահատվի: Խ. Սուքիասյանի մեկնումը նախատեսված է եղել նախորդ օրը, սակայն, «Զվարթնոց» օդանավակայանում սահմանապահները նրան թույլ չեն տվել ինքնաթիռ նստել: Մեկ օր է պահանջվել, մինչև նրա փաստաբաններին հաջողվել է «Մարտի 1-ի» գործը քննող` ՀՔԾ քննչական խմբի ղեկավար Վ. Հարությունյանի ստորագրությամբ հեռախոսագիր ուղարկել օդանավակայանի սահմանապահներին, որից հետո միայն նրան թույլատրել են հատել ՀՀ սահմանը: Ըստ թերթի նախնական տեղեկությունների` Սուքիասյանը կվերադառնա մոտ 1 շաբաթից: Շտապել են ԱԺ աշխատակազմը որոշ դեպքերում կայծակնային արագությամբ է աշխատում: Օրինակ` խորհրդարանի ինտերնետային կայքէջից արդեն հանվել են Հակոբ Հակոբյանի, Մյասնիկ Մալխասյանի և քաղբանտարկյալ Սասուն Միքայելյանի անունները: Հիշեցնենք, որ Հակոբյանի և Միքայելյանի` համապատասխանաբար թիվ 8 և 25 ընտրատարածքներում դեկտեմբերի 6-ին նշանակված են ԱԺ պատգամավորի ընտրություններ: Այսօրվանից սկսվում է թեկնածուների առաջադրումը: Իրականում թեժ է եղել Ուրբաթ օրը Հանրային խորհրդում թեժ քննարկումներ են տեղի ունեցել հայ-թուրքական հարաբերությունների թեմայով: Անկախ լրատվամիջոցներ հրավիրված չեն եղել, իսկ պետական քարոզչամեքենան նիստի մասին հանրությանը հաղորդել է բացառապես իշխանության համար ցանկալի ինֆորմացիա: Իրականում` Վազգեն Մանուկյանի գլխավորությամբ գործող այդ կառույցի շարքային անդամների միջև ուրբաթ օրը տեղի է ունեցել տաք բանավեճ, հնչել են փոխադարձ վիրավորանքներ Թուրքիայի հետ բարեկամանալու կողմանկիցների և Սերժ-Սարգսյան-Էդվարդ Նալբանդյան զույգի արտաքին քաղաքականության հակառակորդների միջև: Այս շաբաթ Հանրային խորհուրդը դարձյալ քննարկումներ է անցկացնելու, թեման կրկին հայ-թուրքական հարաբերություներն են, բայց ենթադրվում է, որ քննարկումներին դարձյալ չեն հրավիրվելու չվերահսկվող լրատվամիջոցները: Գործերը կարգավորվել են Սերժ Սարգսյանի փեսան` Միքայել Մինասյանը, ոչ միայն վերադարձել է կարճատև ուղևորությունից, այլև արդեն հասցրել է կարգավորել աշխատանքային և ընտանեկան հարցերը: Նա շաբաթ օրը կնոջ և երեխայի հետ դուրս է եկել քաղաք` հավանաբար ցուցադրելու ջերմ ընտանեկան հարաբերությունները և հերքելու կոնֆլիկտի ներընտանեկան առկայությունը: Նրանք քայլել են Կասկադի հարևանությամբ, ի ցույց հանրության` նստել «Շառլի» սրճարանում: Ըստ որոշ լուրերի` նրա հրաժարականի դիմումը նետվել է աղբարկղ, և նա առայժմ շարունակում է զբաղեցնել նախկին` ՀՀ նախագահի աշխատակազմի ղեկավարի տեղակալի պաշտոնը: Հարցազրույց բաղնիքո՞ւմ «Հրապարակի» զանգի ժամանակ մարքսիստ Դավիթ Հակոբյանը լողանում էր: Լսելով, որ լրագրող է, արագ դուրս եկավ լողասենյակից, հետո, իմանալով, որ «Հրապարակից» է, ասաց, որ ինքը զբաղված է` ռուսական թերթի լրագրողի հետ է զրուցում: «Բաղնիքո՞ւմ», «Չէ, էդպես եմ ասում, որ չանհանգստացնեն»,- պարզաբանեց նա: