Ֆրանսիայի քաղաքացի, սուտ մատնության համար դատապարտված Սարգիս Հացպանյանի նկատմամբ կկիրառվի համաներում` անկախ նրա ցանկությունից: Այս մասին սեպտեմբերի 24-ին մեզ հայտնեց ՀՀ Գլխավոր դատախազի մամուլի քարտուղար Սոնա Տռուզյանը: Ս.Հացպանյանի վրա տարածվում է ՀՀ ԱԺ համաներման մասին որոշման 7-րդ կետի 3-րդ ենթակետը, ըստ որի դիտավորությամբ հանցագործություն կատարելու համար առավելագույնը 10 տարվա ժամկետով ազատազրկման դատապարտված անձանց նկատմամբ մեկ երրորդով կրճատվում է  պատժաչափի չկրած մասը:  Ս.Հացպանյանը, սակայն, հրաժարվել է այդ հոդվածով համաներումից, պնդելով, որ իր վրա որպես ազատամարտիկի  պետք է տարածվի համաներման մասին որոշման մեկ այլ հոդված: Ս.Տռուզյանը հայտնեց նաեւ, որ ՀՀ Գլխավոր դատախազության Պատիժների  եւ հարկադրանքի  այլ միջոցների կիրառման օրինականության նկատմամբ հսկողություն իրականացնող վարչության դատախազը սեպտեմբերի 23-ին այցելել է Վարդաշեն քրեակատարողական հիմնարկ, որտեղ իր ազատազրկումն է կրում Հացպանյանը, հիմնարկի  վարչակազմը բարձրացրել է նշված հարցը, ինչի վերաբերյալ պարզաբանվել է, որ Հացպանյանի նկատմամբ տվյալ հոդվածը չի կարող կիրառվել`  նրա անձնական գործում բացակայում են մարտական գործողություններին մասնակցելու մասին վկայող համապատասխան պաշտոնական փաստաթղթերը: Սոնա Մաշուրյան