Սարգիս Խաչենց եւ Փրինթինֆո հրատարակչությունները համատեղ հրատարակել են Կոմիտասի նամակների ժողովածուն, որը հրատարակության է պատրաստել Գուրգեն Գասպարյանը: Այն պարունակում է Կոմիտասի գրած 184 եւ ստացած 37 նամակ եւ մինչեւ այժմ հրապարակված նամականիներից ամենաընդգրկունն է: Այստեղ ընթերցողը կգտնի Կոմիտասի նամակները Հովհաննես Թումանյանին, Մաղաքիա Օրմանյանին, Արշակ Չոպանյանին, Մարգարիտ Բաբայանին, Հովհաննես Հովհաննիսյանին, Սպիրիդոն Մելիքյանին, Սիրանույշին եւ ուրիշների: Այս ժողովածուն Կոմիտասի նամակագրական ժառանգության նախորդ հրատարակություններից առանձնանում է ոչ միայն ընդգրկված նամակների քանակությամբ, այլեւ յուրաքանչյուր նամակին վերաբերող ճշգրտված տեղեկություններով եւ մանրամասն ծանոթագրություններով: Գրքի ներածությունից իմանում ենք, որ կազմողը նաեւ կատարել է մանրակրկիտ բնագրագիտական աշխատանք, որի շնորհիվ սրբագրվել են նախորդ հրատարակություններում տեղ գտած բազմաթիվ աղավաղումներ, բնագրի սխալ ընթերցումներ եւ բացթողումներ: Նամականին Երաժշտական մատենաշարի երրորդ գիրքն է, որը հաջորդում է Կոմիտաս Վարդապետի ուսումնասիրությունների եւ հոդվածների երկհատորյակին. Գիրք Ա (2005) եւ Գիրք Բ (2007): Սպասվում է մատենաշարի չորրորդ գիրքը՝  «Կոմիտասը ժամանակակիցների հուշերում եւ վկայություններում»: Գրքերը կարելի է ձեռք բերել Երեւանի գրախանութներում, ինչպես նաեւ Փրինթինֆո հրատարակչությունում՝ հրատարակչական գնով (հեռ. 37410  46 53 80):