Դավիթ Հակոբյանը ընտրվելու իր հնարավորությունը համարում է 90%
ԱԺ լրացուցիչ ընտրություններում Մալաթիա-Սեբաստիա համայնքի թիվ 8 ընտրատարածքում իր թեկնածությունն է առաջադրել Հայաստանի Մարքսիստական կուսակցության նախագահ Դավիթ Հակոբյանը: Նա հաղթելու իր հնարավորությունը համարում է ոչ պակաս, քան 90% և իր մուտքը «պառլամենտարիզմի ինստիտուտ» որակում որպես «նոր գաղափարական սերնդափոխություն»:
«Պառլամենտր ազգի ուղեղն է ու միտքը, դա պոռնկատուն չէ, որ ոսկով առնենք»,-ասում է ավիթ Հակոբյանը: Իր խոսքերով`նա անհրաժեշտություն չունի այդ մանդատը որպես շուք օգտագործել. «Ես առանց այդ մանդատի էլ համարվում եմ ազգի տրիբուն»:
Ըստ պրն. Հակոբյանի`Հայաստանում գործում է բացարձակ ցենզային ընտրական իրավունքը, այսինքն` երբ 50 հազար աշխատավարձ ստացող բժիշկը և 500 միլիոն դոլար շրջանառող կապիտալ ունեցող օլիգարխը մեծամասնական ընտրակարգով պետք է գրավ մուծեն 1 միլիոն դրամ: Թե որտեղից է վճարելու այդ 1 միլիոն դրամը, մարքսիստը պատասխանեց. «Հակոբյան Դավիթը այնքան սնանկ չէ, ինչքան դուք կարծորմ եք»:
Հայաստանի գլխավոր մարքսիստը բացարձակ ցենզային ընտրական իրավունքը համարում է հանցագործ ընտրական իրավունք և նշում, որ պետք է անցում կատարել ինտելեկտուալ, պրոֆեսիոնալ ընտրական իրավունքի: Այդ առթիվ առաջարկում է, որ ապագա պատգամավորները հանձնեն 3 պետական լիցենզավորման քննություններ`համաշխարհային առաջավոր քաղաքակրթությունների պատմություն, համաշխարհային տնտեսագիտություն և հռետորական արվեստ:
Պրն. Հակոբյանը, անդրադառնալով հայ-թուրքական հարաբերություններին, նախապայմանագրերը անվանեց «հաշտեցման աղերսագրեր»: «Հաշտեցման աղերսագրի քննարկումների փուլը ավարտված է, իսկ հոկտեմբերի 10-ից հետո կլինեն հետևանքները. կհանձնվեն պատմական Արցախի 7 գավառները»: Բայց «Արցախ» ակումբում հրավիրված ասուլիսի վերջում Դավիթ Հակոբյանը համոզված էր. «Մենք հարյուր տարի հետո անպայման կվերադառնանք Մասիսի փեշերին»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել