Հոկտեմբերի 5-ին ժամը 14:00-ին Երևան կինոթատրոնի մոտից Ազգային Նոր Պահպանողական Շարժման ուսանողական միությունը կիրականացնի բողոքի երթ դեպի Կառավարություն, Արտաքին գործերի նախարարություն և Նախագահի նստավայր: Երթի ընթացքում պետական մարմիններին կհանձնվի նամակ-պահանջագիր` ՀՀ կողմից ԼՂՀ անկախության ճանաչման գործընթաց սկսելու և հայ թուրքական նախաստորագրված արձանագրություններից հրաժարվելու պահանջով:      Բավական երկար ժամանակ է, որ միջազգային մի շարք հեղինակավոր կառույցներ «գլուխ են ջարդում» հայ ժողովրդի արյան գնով ազատագրված տարածքների ապագան որոշելու համար: Սակայն, ակնհայտ է, որ միջազգային հանրությունն առանձնապես չի շտապում կամ էլ չի կարողանում խաղաղ լուծում գտնել Արցախի խնդրի կարգավորման համար, իսկ այն լուծումները, որ առաջ է քաշում չի բխում Հայ ազգի ու ՀՀ շահերից: Հենց այս հանգամանքները հաշվի առնելով` Ազգային Նոր Պահպանողական Շարժման ուսանողական միությունը որոշեց հանդես գալ նման կարևոր նախաձեռնությամբ: Չնայած  Երևանի քաղաքա-պետարանից երթի արտոնություն ստանալու խնդրանքն առանց որևէ հիմնավորման մերժվել է, բողոքի երթն, այնուամենայնիվ կկայանա: Հայտարարություն-պահանջ ՀՀ Նախագահ Սերժ Սարգսյանին ՀՀ Կառավարության ղեկավար վարչապետ Տիգրան Սարգսյանին ՀՀ Արտաքին գործերի նախարար Էդվարդ Նալբանդյանին Ազգային նոր պահպանողական Շարժման ուսանողական միությունը ըմբռնելով հայ-թուրքական հարաբերությունների «կարգավորման» պատճառով երկու հայկական պետությունների համար առաջացած վտանգի էությունը; փաստելով,  որ նախաստորագրված արձանագրությունների այն կետը, որտեղ հաստատվում է այլ երկրների տարածքային ամբողջականության սկզբունքը, հստակորեն վերաբերվում է Ղարաբաղյան հարցին և ակնարկում Ադրբեջանի, այսպես կոչված, տարածքային ամբողջականությունը; անհանգստանալով այն հանգամանքով, որ մեր պատմական Հայրենիքի որոշ տարածքներ դարձել են քաղաքական շահարկումների առարկա; գիտակցելով Թուրքիայի հետ սահմանների բացման ամբողջ բացասական հետևանքները հայտարարում է, որ հայ-թուրքական հարաբերությունների կարգավորման գործընթացը հակասում է հայ ժողովրդի պետական և ազգային շահերին: Թուրքիայի հետ որևէ պայմանավորվածություններ ձեռք բերելուց առաջ անհրաժեշտ է հստակեցում մտցնել ազգային կարևորություն ունեցող մի շարք գործընթացների տրամաբանության մեջ: Ուստի Ազգային նոր պահպանողական Շարժման ուսանողական միությունը պահանջում է ՀՀ նախագահից և կառավարությունից. ա) ճանաչել Լեռնային Ղարաբաղի Հանրապետության անկախությունը ներկայիս սահմաններում` այդպիսով հստակորեն տարանջատելով հայ-թուրքական հարաբերությունների կարգավորման գործընթացը Լեռնային Ղարաբաղի հիմնահարցից բ) սկսել Լեռնային Ղարաբաղի Հանրապետության միջազգային ճանաչման գործընթաց` չթույլատրելով, որպեսզի Արցախն ետ մնա այդ գործընթացում արդեն իսկ ընդգրկված Կոսովոյից, Աբխազիայից, Հարավային Օսիայից և այլ ինքնահռչակ պետություններից գ) հրաժարվել հայ-թուրքական նախաստորագրված արձանագրությունների ներկայիս տարբերակի վավերացումից: Թուրքիայի հետ հարաբերություններ հաստատելու նախապայման ընդունել Թուրքիայի կողմից Հայերի Ցեղասպանության ճանաչումը, Արևմտյան Հայաստանի հանդեպ հայ ժողովրդի պատմական իրավունքի հաստատումը, ինչպես նաև Թուրքիայի կողմից ՀՀ ապօրինի շրջափակման արդյունքում առաջացած վնասների փոխհատուցումը: