Այսօր ՀՀ Փաստաբանների պալատի ընդհանուր ժողովն էր, որտեղ օրակարգային հարցերից մեկը Պալատի նախագահի ընտրություն էր:  Հիշեցնենք, որ ՓՊ նախագահի թեկնածու առաջադրվել էր միայն գործող նախագահ Ռուբեն Սահակյանը: 351 մասնակիցներից 326-ը քվեարկել է Ռուբեն Սահկյանի օգտին, 14-ը` դեմ, 11 քվեաթերթիկ էլ անվավեր էր ճանաչվել: Մինչ  ընտրությունը առաջին անգամ տրվող «Փաստաբանության ասպետ» շքանշանին այսօր արժանացան վաստակաշատ երեք փաստաբաններ`  Ռոբերտ Գրիգորյանը, Ելենա Շապոշնիկովան և Մասիս Ղազանչյանը: Այսօրվա ժողովում Փաստաբանների պալատի նախագահ Ռուբեն Սահակյանը ներկայացրեց նաև ՓՊ անցած չորսամյա ճանապարհը: ՀՀ փաստաբանների պալատը ձևավորվել է 2005 թվականին: Ընդհանուր թվով 91 նիստերում  670 հարց է քննարկվել:  Չորս տարվա ընթացքում պալատը ձեռք է բերել ժամանակակից տեխնիկական  միջոցներ, վերակառուցել և վերազինել է մասնագիտական գրադարանը: Փաստաբանների 60 տոկոսն այսօր ունի էլեկտրոնային հասցե, մինչդեռ 2005 թ. միայն 10 տոկոսն ուներ: Փաստաբանների պալատը նաև կայքէջ ունի, բայց այն այսօր չի գործում, քանի որ ենթարկվել է ադրբեջանական հակերների հարձակմանը: Ռուբեն Սահակյանը որպես կարևորագույն խնդիր նշեց փաստաբանների վերապատրաստումը և ուսուցումը: Տարբեր ուսուցման ծրագրեր են իրականացվում, Եվրախորհրդի և Ֆրանսիայի փաստաբանական պալատի հետ, կան նաև պայմանավորվածություններ Երևանում և մարզերում սեմինարներ անցկացնելու համար:   «Ճիշտ է, աշխարհը պատած ֆինանսական ճգնաժամն իր լուրջ ազդեցությունն է թողել, և դրա պատճառով կտրուկ նվազել են աջակցության համար տրամադրվող ֆինանսական միջոցները, բայց մենք փորձում ենք նոր գործընկերների  ներգրավման միջոցով  կոմպենսացնել առաջացած բացը»,-ասաց Ռուբեն Սահակյանը: ՓՊ նախագահը ներկաներին ուրախալի լուր հաղորդեց: Երեկ մեկնարկել է արդարադատության ծրագրի մատչելիոթյան  ծրագիրը: Ստեղծվելու է փաստաբանական դպրոց, որն արժե մի քանի մլն եվրո: Դատաիրավական բարեփոխումների 2009-2011թթ. ռազմավարական գործողությունների  ծրագրի իրականացման շրջանակներում  առաջիկայում պալատին պետք է տրամադրվի  շուրջ 350 մլն  դրամի չափով միջոցներ Հանրային պաշտպանի գրասենյակի  և փաստաբանների դպրոցի շինարարության կամ ձեռքբերման համար: ՓՊ-ը նաև այլ երկրների հետ տեսակամուրջներ անցկացնելու տեխնիկական հնարավորություն ունի:  Լոնդոնի հետ արդեն երեք տեսակամուրջ է անցկացվել, քննարկվել են Եվրոպական դատարան դիմելու, եվրադատարանի նախադեպերին վերաբերող հարցեր: Ռուբեն Սահակյանի գնահատմամբ` Հանրային պաշտպանի գրասենյակը Հայաստանում նույնպես կայացել է. «Հանրապետության բոլոր մարզերում գործում են հանրային պաշտպաններ:  Տարեց տարի զգացվում է, որ նրանք պատասխանատվությամբ են կատարում իրենց առաքելությունը` անվճար իրավաբանական օգնություն են տրամադրում բնակչության անվճարունակ խավին»: Փաստաբանների որակավորման քննությունները արդյունքներով 800 հավակնորդներից 379-ին արտոնագիր է ստացել: ՓՊ կարգապահական հանձնաժողովը  դատարանի սանկցիաներով  հարուցված վարույթներով  կագապահական պատասխանատվության է ենթարկել երկու փաստաբանի: «Սակայն դատախազությունը դատաիրավական համակարգի, մեզ հայտնի պաշտոնյաների չարության արդյունքում չորս փաստաբանների մեղավոր է ճանաչել, մեր համոզմամբ` հակասահմանադրական հանդիսացող ՀՀ քրեական օրենսգրքի 343 հոդվածի առաջին մասով, և նրանց նկատմամբ քրեական գործերը գտնվում են դատարանում»,-նշեց Ռ. Սահակյանը: Պալատի խորհուրդը որոշել է դիմել Մարդու իրավուքնների պաշտպանին` նշված հոդվածի սահմանադրականությունը վիճարկելու խնդրանքով: Եվ ՄԻ պաշտպանը, ընդառաջելով պալատի խնդրանքին, դիմել է ՍԴ: