«Առաջին ամիսներին շատ մտահոգ էի, քանի որ չէի կարծում, որ մենք պատրաստ ենք այս քայլն անել, քանի որ այդ երկիրն ամեն ձևով պատրաստված էր թվում, իսկ մենք դեռ պատրաստ չէինք»,- անդրադառնալով Հայաստանի և Թուրքիայի միջև սահմանների բացմանը` «Հայելի» ակումբում կայացած մամուլի ասուլիսի ժամանակ ասաց գործարար Վահագն Հովնանյանը: Հիմա արդեն, գործարարը կողմ է սահմանների բացմանը: Նա գտնում է, որ հետաձգելու կարիք չկա: «Քանի անգամ ասել եմ, որ կարծես թե նոր ջրհեղեղ է լինելու` թուրքական ջրհեղեղ: Բայց մենք պետք է պատրաստվենք դրան, միևնույնն է` այդ հարցը բարձրանալու է»,- ասաց նա: Վ. Հովնանյանը գտնում է, որ կյանքն ամեն օր նոր մարտահրավերներ է բերում իր հետ: Իսկ մենք Թուրքիայի հետ հարևաններ ենք. ուզենք, թե չուզենք, ողջ կյանքներս նրանց հետ ապրելու ձև պետք է գտնենք: «Եթե ամեն օր  հետաձգենք, չգիտեմ, թե որ օրն ենք պատրաստ լինելու: Ավելի ճիշտ է այսօր դա անենք, քան հետաձգենք վաղվան: 20 տարի է արդեն, որ մենք բանտում ենք, պաշարված ենք: Պետք է մեր դռները բացենք ու նոր ձևով ապրենք: Վախը մահ է, եթե հրավիրված ես մարտի ու վախով ես մոտենում դրան, լավ չէ»,- ասաց նա: Անդրադառնալով սփյուռքահայության արձագանքին` գործարարը նշեց, որ երկու Հայաստան է ստեղծվել` սփյուռքահայության Հայաստանն ու բուն Հայաստանը: Բուն Հայաստանը հողային պահանջ չունի: Սակայն նույնը չենք կարող ասել «սփյուռքահայության Հայաստանի» համար: «Սյուռքահայությունն է այդ ամենը կրել, ջարդերը տեսել: Նրանք պահանջ ունեն»,- կարծում է Վ. Հովնանյանը: Նախագահի համահայկական այցը Վ. Հովնանյանը ճիշտ է համարում: Գտնում է, որ նա շատ ճիշտ է արել, որ համարձակորեն գնացել, ասել է` այսպես եմ ուզում անել: «Որովհետև ինքն է պատասխանատու, ամեն մարդ պատասխանատու չէ դրա համար: Նախագահն ինքն է առել իր ուսերին այն որոշումը, որ այսօր ժամանակն է այդ հարաբերություների»: Սփյուռքի մոտեցումն էլ նախագահի այցին Վ. Հովնանյանը նույնպես բնական է համարում: Ծայրահեղություններ կան, բայց շատ առողջ արտահայտություն է դա: «Մեկը մտահոգ է, կարող է բողոքել: Սա ազատ ձայնի դրսևորումն է: Ես միայն չէի ցանկանա, որ որևէ հայ գնար այնտեղ` Թուրքիա, ապրելու: Ո՞վ կուզենա այնտեղ ապրել: Հայաստան չեն գալիս կամ Արցախ, ինչո՞ւ պետք է գնան Թուրքիա` ապրելու համար: Սա պարզապես պետք է լավ առիթ լինի Հայաստանի համար` իր դիրքերն ամրապնդելու»,- ասաց նա: Արդյոք կարո՞ղ է այս ամենը սփյուռքի ու Հայաստանի միջև սեպ խրել: Գործարարի կարծիքով, դա հնարավոր է, սակայն ժամանակն ամեն ինչ իր տեղն է դնելու: «Հայաստանը չի կարող այս ձևով ապրել, պետք է հազարումեկ դռներ ունենա»,- ասաց նա: