Ով ծանոթ չէ Գրիգորի Խաչատրյան երեւույթին, նրան առաջին անգամ հանդիպելիս կարող է կարծել, թե խենթ է: Նա կարծում է, որ չկան մարդիկ եւ ազգություններ, այլ կա Գրիգոր Խաչատրյան, իսկ մյուս մարդիկ պարզապես Գրիգոր Խաչատրյանի ժամանակակիցներն են: Ամենաանլուրջ բաների մասին Գ.Խաչատրյանն այնպիսի լրջությամբ է խոսում, որ կարող է կասկածես, թե մեղքը քոնն է, որ նրան չես հասկանում:

Այս շաբաթ Գրիգոր Խաչատրյանը կազմակերպել էր Պատահականությունների պլանավորման միջազգային կենտրոնի շնորհանդեսը: Կենտրոնը սկսել է գործել դեռ 2008 թվականի սեպտեմբերից, այն ժամանակ ազգային էր կոչվում, հիմա դարձել է միջազգային: Կենտրոնում գործում են քաղաքական գործընթացների եւ բնակլիմայական փոփոխութունների պլանավորման գրասենյակներ:

-Պարոն Խաչատրյան, ինչպե՞ս եք պլանավորելու պատահականությունները:

-Պատահականությունն ամենաազատ բանն է, ոչ ոք չի կարող նրան ձեռ տալ, ընդհանրապես ազատությունը սահմաններ չի ճանաչում, այդ առումով պատահականութունն ու անակնկալներն ամենաազատ բաներն են: Նրանք օգնում են, որ դու ազատության հետ սերտ կապի մեջ մտնես:

-Իսկ ինչպե՞ս եք պլանավորելու, այսինքն` սահմանափակելու այդ ազատութունը:

-Ես չեմ սահմանափում ազատությունը, ես նրա հետ աշխատում եմ: Դա պատահականությունների պլանավորման գաղտնիքի մեջ է մտնում, որը եթե բացում ես, այլեւս չի դառնում պատահականություն: Բայց այն ինչ կատարվում է, ես դրա համար պատասխանատվությունը վերցնում եմ ինձ վրա, ցանկացած պատահականության դեպքում:

-Եթե ես այսօր պատահաբար մեքենայի տակ ընկնեմ, դո՞ւք եք պատասխան տալու, ինչպե՞ս:

-Բարոյահոգեբանախոհափիլիսոփայական հարթության վրա:

-Պատահականությունների պլանավորման գաղտնիքը միա՞յն Ձեզ է հասու:

-Այո:

-Ինչո՞ւ հենց Դուք:

-Որովհետեւ ես մարդ չեմ, ես Գրիգոր Խաչատրյան եմ, Դուք մարդ չեք, Դուք Գրիգոր Խաչատրյանի ժամանակակիցներն եք:

-Տպավորություն է ստեղծվում, թե Դուք չափից ավելի ինքնահավան եք:

-Ես այդ առումով աշխատանք ունեմ, որը կոչվում է. «Ես ավելի մեծ եմ, քան ես կարծում եմ»: Այսինքն այդ հարցերն այնքան են առաջացել, որ այդ ֆորմատի մեջ գործ է առաջացել:

-Մինչ օրս եղած անակնալներից ո՞րն էիք Դուք պլանավորել:

-Իսկ Ձեզ համար ո՞րն էր անակնկալը:

-Օրինակ` «Ժառանգություն» կուսակցությունում տեղի ունեցած վերջին իրադարձությունները:

-Ուրեմն` դա ես էի պլանավորել: Եթե ես դա ծրագրավորած չլինեի, մեխանիզմը չէր աշխատի:

-Իսկ հայ ազգի համար Դուք որեւէ բան պլանավորե՞լ եք:

Լուսավոր ապագա: