Գյումրիի թիվ 28 դպրոցի նախկին տնօրեն Համլետ Ավետիսյանն այս տարվա օգոստոսի 5-ին իր պաշտոնից ազատումն համարում է անօրինական: Նախկին տնօրենի 65 տարին լրանում է 2011թ.-ի նոյեմբերի 11-ին եւ  մեկ ամիս շուտ կամ մեկ ամիս ուշ, միեւնույն է, ազատվելու էր աշխատանքից: Սակայն Համլետ Ավետիսյանին վրդովվեցրել էր Շիրակի մարզպետարանի Կրթության վարչության իր նկատմամբ դրսեւորած վերաբերմունքն ու, ըստ նրա, օրենքի խախտումներով գործելակերպը:

«Եթե ինձ կանչեին, ասեին` գիտես ինչ, պետք է դիմում գրես աշխատանքից ազատվելու համար, որովհետեւ ՊՈԱԿ-ի օրենքով այլեւս պաշտոնավարելու իրավունք չունես, ես կանեի, բայց ամեն ինչ արվել է թաքուն, անգամ ծանուցում չի ուղղարկվել, այնինչ պարտավոր էին 42 օր առաջ ծանուցել այդ մասին,-«Ասպարեզ» ակումբում հրավիրած մամլո ասուլիսի ժամանակ հայտարարեց Համլետ Ավետիսյանը,-իմ` աշխատանքից ազատման վերաբերյալ մարզպետի որոշումը թվագրված է օգոստոսի 5-ին, իսկ ես այդ մասին տեղեկանում եմ միայն ամսի 16-ին»:

Համլետ Ավետիսյանն ընդունում է, որ թոշակային տարիքի լրանալու հետ կապված ինքը չէր կարող մասնակցել հավաստագրերի համար անցկացվող մրցույթներին, սակայն, չգիտես ինչու, իր անունը հայտնաբերել է մրցույթին մասնակցած եւ դուրս մնացած տնօրենների ցուցակում, որոնք աշխատանքից ազատվել են այդ հիմնավորմամբ: Աշխատանքից ազատելու որոշման հետ կապված թիվ 28 դպրոցի նախկին տնօրենը փորձել է հանդիպել եւ խոսել մարզպետ Աշոտ Գիզիրյանի հետ:

Վերջինիս արձակուրդում գտնվելու պատճառով նրան ընդունել է փոխմարզպետ Սեյրան Պետրոսյանը, ով, տեղեկանալով խնդրին, Համլետ Ավետիսյանին ասել է, որ մարզպետի որոշումն ենթակա չէ վերանայման: Չհաջողեցնելով անձնական հանդիպում ունենալ մեկ օր առաջ արձակուրդից վերադարձած մարզպետի հետ, Համլետ Ավետիսյանը խոստովանեց, որ հույս ունի իր բողոքը տեղ հասցնել լրատվամիջոցների օգնությամբ: Նա պատրաստվում է դիմել նաեւ Վարչական դատարան` պաշտոնում վերականգնվելու նպատակով. «Թեկուզ 5 օր աշխատեմ, հետո ես իմ ձեռքով դիմում կգրեմ դուրս կգամ»,-հայտարարեց Համլետ Ավետիսյանը:

Շիրակի մարզպետարանի կրթության վարչության պետ Սահակ Մինասյանը, ներկայացված մեղադրանքներին ի պատասխան, նշեց, որ ամեն ինչ արվել է օրենքի սահմաններում: 2003թ-ից, երբ դպրոցները դարձան ՊՈԱԿ-ներ, ընդունվեց օրենք, որի համաձայն` մրցույթով անցած տնօրենները 5 տարուց ավելի աշխատելու իրավունք չունեն, իսկ թիվ 28 դպրոցի նախկին տնօրենը դեռ մի բան էլ ավել է պաշտոնավարել` 7 տարի:

«Ոչ մի իրավական խախտում որոշման մեջ չկա մի պարզ պատճառով. Համլետ Ավետիսյանը աշխատել է թիվ 28 դպրոցի տնօրենի պաշտոնակատար առանց պայմանագրի: Ինքը մեկ տարով հրամանագրվել է որպես ժամանակավոր պաշտոնակատար մարզպետ Նանյանի օրոք, իսկ ներկայիս մարզպետի օրոք` անորոշ ժամանակով եւ առանց պայմանագրի, որն իրավունք է վերապահում գործատուին համապատասխան հոդվածին հղում կատարելով, առանց զգուշացման ազատել նրան զբաղեցրած պաշտոնից: Սա զուտ իրավական հիմքն եմ ասում,-նշեց Սահակ Մինասյանը,-Համլետ Ավետիսյանը քաջատեղյակ էր, որ չէր շարունակելու աշխատանքը, որովհետեւ ի սկզբանե չէր էլ մասնակցել հավաստագրման գործընթացին եւ բացի դրանից չուներ նաեւ հստակ աշխատանքային պայմանագիր. նա հրամանագրված էր անորոշ ժամանակով»:

8 տարի թիվ 28 դպրոցում պաշտոնավարած Համլետ Ավետիսյանի կուսակցական /ՀՅԴ/  պատկանելիությունը աշխատանքից ազատելու հետ ոչ մի կապ չունի. «Հետքի» հարցին ժխտողական պատասխան տվեց Սահակ Մինասյանը: Նույնը պնդեց նաեւ նախկին տնօրենը` ասելով, թե 15 տարի համագործակցելով Կրթության վարչության հետ երբեւէ խնդիրներ չի ունեցել, անգամ նկատողության չի արժանացել: Սակայն, Սահակ Մինասյանի կարծիքով, ընդդիմացողի կեցվածքով իրավունքներից ու խախտումներից խոսող Համլետ Ավետիսյանն այլ նպատակ է հետապնդում:

Թե ինչ նպատակ, կրթության վարչության պետը չմանրամասնեց` ասելով, թե զերծ է մնում տեղեկատվություն տալուց, միայն նշեց, որ շահարկումը Համլետ Ավետիսյանի կողմից անտեղի չէ: Իսկ մեզ հասած տեղեկություններով, դաշնակցական տնօրենը պատրաստվում է Ամերիկա մեկնել, եւ հալածվողի կերպարն այս դեպքում լավագույն փաստարկն է` քաղաքական ապաստան խնդրելու:

Նոր ընտրություններ թիվ 28 դպրոցում անցկացվելու են սեպտեմբերի 26-ին: Մինչ այդ այստեղ ժամանակավոր պաշտոնակատար է նշանակվել փոխտնօրեն Մարիամ Առաքելյանը: