Մենուա Բրուտյան
28 տարեկան

«Ոչ մի օրենքով` ո՛չ գողական, ո՛չ մարդկային, ո՛չ ժողովրդավարական օրենքներով չի կարելի մարդուց խլել իր ընտրելու ձայնը: Դա չի վաճառվում: Խաբում են, առնում են փողով: Նենց սոցիալական վիճակ են ստեղծում, որ մարդիկ էդ կոպեկներին են նայել»:

«Մենք պահանջում ենք վերականգնել մեր ազատ ընտրություն կատարելու իրավունքը»:

«Ես Լեւոնի նկատմամբ հատուկ համակրանք ունեմ: Ես տեսնում եմ, որ այսօր միայն նա կարող է համախմբել մարդկանց»:

«Մենք պետք է հասնենք նրան, որ այս ընտրությունները չեղյալ հայտարարվեն: Մենք դա անելու ենք խաղաղ երթերի, նստացույցերի միջոցով, ինչպես ասել է մեր ընտրած նախագահը»:

Լեւոն Բաբաջանյան
17 տարեկան

«1988-ին մեր հայրերը պայքարել են արտաքին թշնամու դեմ, հիմա մեր թշնամին ներսում է, դա ավելի վատ է»:

«Մեզ վիրավորում է, որ ինչ-որ օլիգարխների հպատակներ գալիս ծեծում են վստահված մարդկանց, տանում Սեւան: Այդ օրը ես ինքս տեսել եմ, որ կեղծումներ են եղել, մարդկանց ծեծել են, Արաբկիրի թաղապետը մեր շտաբի պետին ծեծեց իմ աչքի դիմաց: Ի՞նչ իրավունքով»:

«Եթե չհավատայինք, այստեղ չէինք գա: Այսօր բերետավորները մեզ փորձեցին ճամփից շեղել, բայց չստացվեց, մենք եկանք այստեղ, որովհետեւ էս պահին պիտի այստեղ լինենք»:

«Մեր ընկերները զանգում ասում են, որ համալսարանների դռները փակում ու չեն թողնում, որ գան այստեղ»:

«Ես Լեւոն Տեր-Պետրոսյանի ֆանատիկը չեմ ու չեմ ասում, որ ինքը միշտ ճիշտ է եղել, բայց հիմա ժամանակն է թելադրում, որ մենք այստեղ իր կողքին լինենք»:

«Եթե Լեւոն Տեր-Պետրոսյանը գա, իշխանափոխություն չի լինի, որովհետեւ Ազգային ժողովում հանրապետականներն են, բայց ես վստահ եմ, որ կառավարման մեխանիզմները կփոխվեն: Հանրապետականների մեջ էլ լավ մարդիկ կան, եթե կառավարման մեխանիզմները փոխվեն, կառավարման որակն էլ կփոխվի»:

«Սերժին ընտրողներ էլ կային, բայց նա չի հաղթել»:

Իշխան Գեւորգյան
18 տարեկան

«Ինձ դուր չի գալիս, որ ամեն ինչ մի քանի մարդկանց ձեռքում է, ու մյուսների բարեկեցությունը նրանցից է կախված»:

«Ինձ համար կարեւոր է այստեղ գալ: Ես զգում եմ, որ այստեղ պիտի լինեմ»:

«Ես քաղաքականությամբ չեմ հետաքրքրվում, ես իմ ու իմ ընկերների ապագայի մասին եմ մտածում: Բոլոր ընկերներս էլ լավ սովորում են, ուզում եմ, որ նորմալ ապագա ունենան»:

Հայկ Խալափյան
19 տարեկան

«Ես չեմ պատկերացնում` ինչ ընթացք կունենա, որովհետեւ ես հավատում էի, որ կեղծումներ չեն լինի, ու ամեն ինչ այլ ընթացք կունենա: Բայց հիմա վստահ եմ, որ կեղծումներ են եղել»:

«Ոզում եմ փոխվի, այստեղ հեռանկար չկա, ամեն ինչ մի քանի հոգի է որոշում»:

«Ես պահանջում եմ երկրորդ փուլ եւ հեռուստաբանավեճ: Ես ուզում եմ, որ հեռուստաալիքները ցույց տան` ինչ է կատարվում այստեղ, որ գյուղերի մարդիկ էլ իմանան»:

«Ցանկացած մեկին փողոցում բռնեն հարցնեն, կասեն` ինչ կեղծիքներ են տեսել, եթե այդ դիտորդները դա չեն տեսնում, այդ դեպքում ես չեմ հասկանում` նրանք ինչի՞ համար են եկել Հայաստան»:

«Ինչու՞ հեռուստաընկերությունները չեն լուսաբանում այս ամենը, որ արդեն երեք օր է տեղի է ունենում, ինչու՞ դիտորդները չեն տեսնում այս ամենը»:

«Իմ կարծիքով` Սերժ Սարգսյանը չի ընտրվել: Ես չեմ կարող ասել, որ Լեւոն Տեր-Պետրոսյանն է ընտրվել: Այդ պատճառով էլ պահանջում եմ երկրորդ փուլ»:

Կարեն Հակոբյան
18 տարեկան

«Ես կարծում եմ, որ կեղծիքներ են եղել: Ես ուզում եմ չեղյալ հայտարարվեն ընտրությունները: Իշխանությունները պետք է հաշվի նստեն մեզ հետ»:

«Ես գոհ եմ մարդկանց արձագանքից:

Եթե Սերժ Սարգսյանի միտինգներին բերում ու ներկա-բացակա էին անում, այստեղ մենք մեր կամքով ենք գալիս»: