Տեսանյութեր
Լուսանկարներ
ԱԳՆ 6 պաշտոնյաներ հեռացվել են աշխատանքից
Դեսպաններ Ռուբեն Շուգարյանի, Լեւոն Խաչատրյանի, Ռազմիկ Խումարյանի եւ փոխարտգործնախարար Արմեն Բայբուրդյանի`փետրվարի 23-ի հայտարարությանը երեկ միացել են ՀՀ արտաքին գործերի նախարարության եւս վեց բարձրաստիճան պաշտոնյաներ` ԱԳՆ մամուլի քարտուղար Վլադիմիր Կարապետյանը, միջազգային կազմակերպությունների վարչության ՄԱԿ-ի բաժնի վարիչ Վարսենիկ Բաղդասարյանը, Ամերիկայի եւ Կանադայի բաժնի վարիչ Կարինե Աֆրիկյանը, ԱԳՆ սպառազինության եւ անվտանգության հարցերի վարչության ՆԱՏՕ-ի բաժնի վարիչ Մարթա Այվազյանը, Եվրոպայի վարչության խորհրդական Առաքել Սեմերջյանը եւ Ամերիկայի վարչության Հարավային Ամերիկայի բաժնի երկրորդ քարտուղար Էլեն Պետեյանը:
Այսօր` փետրվարի 25-ին, արտգործնախարար Վարդան Օսկանյանը, մեկնաբանելով ԱԳն աշխատակիցների այս քայլը, ասել է. «Դիվանագիտական պաշտոն վարող մարդն իրավունք չունի նման դիրքորոշում արտահայտել: Օրենքը դա թույլ չի տալիս»:
Նախարարը նշել է, թե «…ցավով է ստորագրել նրանց հեռացման մասին հրամանները, քանի որ դա հարված էր համակարգին»:
«Ինչպես եք պատկերացնում, որ այդ անձինք հանրապետության նախագահին ներկայացրել են միջազգային հանրությանը, իսկ այժմ կանգնում են այն թեկնածուի կողքին, ով երկրի նախագահին անվանում է ավազակապետ»,- լրագրողներին հարցրել է նախարարը:
Վարդան Օսկանյանի հավաստմամբ` հիշյալ դիվանագետները անձնական կամ գործանական կապեր են ունեցել նախկին նախագահ Լևոն Տեր-Պետրոսյանի հետ: «Սակայն մենք խտրականություն չենք դրել նրանց միջև: Ես ցանկություն էլ չունեմ իմանալու, թե այլ նման դիրքորոշում ունեցողներ կան արդյոք, թե ոչ, քանի որ մենք վհուկների որսով չենք զբաղվելու»,-եզրափակել է Վարդան Օսկանյանը:
Մեկնաբանել