ՀՀ գլխավոր դատախազության մամուլի ծառայությունը հաղորդում է.

«ՀՀ Նախագահի 2008 թ. մարտի 1-ի հրամանագրով Երեւան քաղաքում հայտարարված արտակարգ դրության պահանջներին չենթարկվելու եւ 2008 թ. մարտի 1-ի լույս 2-ի գիշերը ՀՀ Նախագահի թեկնածու Լեւոն Տեր-Պետրոսյանի եւ նրա համախոհների կողմից, օրենքով սահմանված կարգի խախտմամբ, կազմակերպված  հանրահավաքի մասնակիցների կողմից ոստիկանության մարմիններին ցուցաբերված դիմադրության հետեւանքով  առաջացած ընդհարման ժամանակ զոհվել է 8 մարդ:

ՀՀ հատուկ քննչական ծառայության, ազգային անվտանգության ծառայության, ոստիկանության եւ հարկային մարմինների քննիչներից եւ օպերատիվ աշխատողներից ձեւավորված քննչական-օպերատիվ խմբի ձեռնարկած միջոցառումների արդյունքում առայժմ հաջողվել է պարզել զոհված անձանցից 4-ի ինքնությունը՝ Գոռ Քլոյան, Համլետ Թադեւոսյան, Դավիթ Պետրոսյան, Զաքար Սարիբեկի  Հովհաննիսյան: Մյուս զոհերի  ինքնությունը ճշտվում է, միջոցներ են ձեռնարկվում նրանց մահվան, ինչպես նաեւ մայրաքաղաքում տեղի ունեցած անկարգությունների հանգամանքները պարզելու ուղղությամբ:

Անկարգությունների հետեւանքով  վնասվել է երկու տասնյակից ավելի անշարժ ու շարժական գույք:

Քննչական-օպերատիվ խմբի ձեռնարկած միջոցառումների արդյունքների մասին կհայտնենք լրացուցիչ»: