Լուսավոր դասասենյակներ, գրադարան, համակարգչային սենյակ, շախմատի դասերի համար հատուկ կահույք, սպորտդահլիճ եւ այլն, նույն նախագծով եւ «Լինսի» հիմնադրամի միջոցներով վերակառուցվել էր նաեւ Շիրակի մարզի Արթիկի տարածաշրջանի Արեւշատ համայնքի միջնակարգ դպրոցը:

Տարածքային կառավարման նախարար Արմեն Գեւորգյանն ու Գիտության եւ կրթության նախարար Արմեն Աշոտյանը Նոր Կյանքի միջնակարգ դպրոցում շրջելուց հետո մարզային իշխանությունների ուղեկցությամբ եղան նաեւ Արեւշատ գյուղում:

Ինչպես կատակով նկատեց Շիրակի մարզպետարանի կրթության վարչության աշխատակիցներից մեկը, անցյալում այստեղ դասալսումների մասնակցում էին անձրեւանոցները գլխավերեւներում պահած, իսկ հիմա շահագործման է հանձնվել նորոգ, տիպային դպրոցական շենք:

Գոհ տեսածից, ոգեւորությունը չթաքցրեց նաեւ Շիրակի մարզպետ Աշոտ Գիզիրյանն ու հայտնվելով նորակառույց սպորտային դահլիճում մեծ աշխուժությամբ սեղանի թենիսի մի փոքրիկ խաղ ցուցադրեց` որպես մրցակից ընտրելով դպրոցի տնօրենին:

Արեւշատի միջնակարգ դպրոցը եւս նախատեսված է 360 աշակերտի համար: Սարակապի դպրոցը, որ շահագործման կհանձնվի սեպտեմբերի 2-ին, իսկ բացման արարողությանն էլ կմասնակցի վարչապետ Տիգրան Սարգսյանը, 240 դպրոցականի համար է:

Շիրակի մարզում դպրոցաշինության նոր ծրագրեր հիմնադրամի միջոցներով չեն լինի, իսկ պետբյուջեից միջոցներն այս նպատակին կհատկացվեն: «2011թ.-ին կրթության եւ գիտության նախարարության խնայողությունների հաշվին ավելացրել ենք դպրոցաշինությանը հատկացված գումարները, հատկապես ավագ դպրոցների համար»,-փաստեց նախարար Արմեն Աշոտյանը:

Հաջորդ տարի եւս կառավարությունը կանդրադառնա դպրոցաշինությանը, հավաստեց փոխվարչապետ Արմեն Գեւորգյանը, քանի որ մարզերից ներկայացված ծրագրերի 40 տոկոսը դրան են վերաբերում:

Ինչ վերաբերում է Վարդաքարի դպրոցական շենքի չարչրկված խնդրին, փոխվարչապետը խորհուրդ տվեց վարդաքարցիներին առայժմ հաճախել Նոր Կյանքի նորակառույց դպրոց, մինչեւ կառավարությունը կունենա հավելյալ գումարներ իրենց գյուղում դպրոց կառուցելու համար: