Վրույր Թադեւոսյան, ԵՊՀ Ժուռնալիստիկայի ֆակուլտետի ուսանող

Չորաթան գյուղի բնակիչները խուճապի մեջ են. «Հեկտարներով ցորեն ունենք, բայց կոմբայն չկա. վենց դենք էդքան բերքը տուն քցիլ... Էս արդեն մի տարի ա մեզ խափըմ են` թե կոմբայն դեն պիրիլ կեղի հմար, բայց ու՞ր ա...

Էլ ինչքա՞ն ճամփա պահենք էդ կոմբայնին... Առանց կոմբայնի դե՞նք ցորենը հնձիլ»,- բողոքում են գյուղացիները: Խնդիրն այն է, որ գյուղում կոմբայն չկա, հին կոմբայնը 1984 թ. արտադրության է, որով այլեւս հնարավոր չէ հնձել: 

«Գյուղացիների բողոքն արդարացի է. մեկ տարուց ավելի է սպասում ենք նոր կոմբայնին, բայց այդպես էլ չստացանք»,- ասում է Չորաթանի համայնքապետ Վարուժան Բաղմանյանը: Չորաթան գյուղն առաջինն է պայմանագիր կնքել «Գյուղական բարեփոխումների աջակցության ծրագրի» իրականացման գրասենյակի (ԾԻԳ) հետ, որ արտերկրից իրենց համար կոմբայն գնի: Պայմանագիրը կնքվել է 2007 թ., բայց մինչ օրս կոմբայնը գյուղ չի հասել: ԾԻԳ-ում կոմբայնի ուշանալը տարբեր կերպ մեկնաբանեցին:

«Տեխնիկայի համար մրցույթ է կազմակերպվել, եւ այն շահել է մի կազմակերպություն, բայց պայմանագրով նախատեսված ժամկետում չի հասցրել ուղարկել, եւ պայմանագիրն ուժը կորցրել է: Արդյունքում կրկին մրցույթ է կազմակերպվել, դրա համար էլ Չորաթան ուղարկվելիք կոմբայնն ուշացել է: Նոր կազմակերպության հետ արդեն ե՛ւ պայմանագիր է կնքվել, ե՛ւ գումարն է փոխանցվել: Միակ խնդիրն այստեղ պարզելն է, թե ինչպես է կատարվել թղթարարությունը, եւ տեսնենք` կարո՞ղ ենք որեւէ կերպ նպաստել, որ կոմբայնը շուտ հասնի գյուղ»,- ասաց «Գյուղական բարեփոխումների աջակցության ծրագրի» մարզային աջակցության թիմի կոորդինատոր Պավել Ցուցուլյանը:

«Գյուղական բարեփոխումների աջակցության ծրագիր» ԾԻԳ-ի ֆինանսական գծով փոխտնօրեն Արտավազդ Խալաթյանն այլ կերպ է մեկնաբանում կոմբայնի ուշացումը: Նա ողջ մեղքը բարդեց Համաշխարհային բանկի եւ կոմբայնն առաքող ընկերության` «Տեխնոկոմի» վրա. «Սկզբում Համաշխարհային բանկով էինք ակրեդիտիվ բացել, նա էր գումարն ուղարկելու: Մի մախինա էլ Համաշխարհային բանկն ա, էլի: Բանկին մի քանի անգամ դիմեցինք պայմանագրի ժամկետը երկարացնելու համար, մեկ ամսից ավել տեւեց, մինչեւ պատասխանեցին: Ամեն դեպքում` տվեցին: Հետո էլ «Տեխնոկոմի» ղեկավարությունն օպերատիվ չաշխատեց, մինչեւ պայմանագրի ժամկետը լրացավ: Դրանից հետո պայմանագրի ժամկետը նորից պետք է երկարացնեինք, իսկ որպեսզի արագ ստացվեր` «Էյչ-էս-բի-սի» բանկի հետ պայմանագիր կնքեցինք»:

Մեր հարցին, թե ինչու՞ բանկի հետ պայմանագիր կնքելը մեկ տարի տեւեց, Ա. Խալաթյանը պատասխանեց, թե այդքան բան արդեն չի հիշում:

Ի դեպ, ակրեդիտիվ բացելու փաստաթղթերը Ա. Խալաթյանը պատրաստվում էր բանկ տանել հենց այն օրը, երբ մենք առաջին անգամ` հունիսի 9-ին, ծրագրի իրականացման գրասենյակում էինք: Մեր երրորդ այցի ժամանակ Արտավազդ Խալաթյանը զանգահարեց «Տեխնոկոմի» գրասենյակ` Ռոստով: Այնտեղից տեղեկացրին, որ բեռնավորումը կատարել են հունիսի 30-ին:

Արդեն ստացվել են նաեւ կոմբայնի փաստաթղթերը, իսկ կոմբայնը դեռ ուշանում է: Գյուղացիների անհանգստությունն էլ ավելի է մեծանում. հին կոմբայնով չեն հասցնի հունձն ավարտել, հնձված հացահատիկն էլ անորակ կլինի: «Մինչեւ էդ կոմբայնը հասնի ստէ, մեր կեղի արտերը լոխ վեր կթափեն, էլ ու՞մ ա պետկը»,- ասում են չորաթանցիները: Համայնքապետն էլ շտապում է հանգստացնել համագյուղացիներին` խոստանալով, որ հարեւան գյուղերից, նույնիսկ ուրիշ մարզից կոմբայն կբերի, եւ նրանց բերքն ամբողջությամբ ու անվնաս տուն կհասնի: