Ես բազմիցս տարակուսանք եմ հայտնել տարիներ շարունակ հայաստանյան գրեթե բոլոր ԶԼՄ-ներով  ցուցադրվող կամ տպագրվող  Արցախի Հանրապետության քարտեզի աղավաղման կապակցությամբ: Փաստորեն որպես ԼՂՀ-ի քարտեզ` տարածվում է միայն նախկին Լեռնային Ղարաբաղի Ինքնավար Մարզի եւ Շահումյանի շրջանի միասնական տարածքը պատկերող քարտեզը, ինչը հակասում է Արցախի Հանրապետության Սահմանադրության 142-րդ եւ «Վարչատարածքային բաժանման մասին» օրենքի 2-րդ հոդվածներին: Վերջերս «Վեստի» հեռուստածրագրին տված հարցազրույցի ժամանակ Հայաստանի գործող նախագահի  կողմից  հնչեցված պատասխաններից պարզ դարձավ, որ այս ամենը ոչ թե առանձին ԶԼՄ-ների սխալմունք է, այլ Հայաստանի իշխանությունների կողմից տարիներ առաջ որդեգրած եւ մինչ օրս շարունակվող քաղաքականություն, այն է` Ադրբեջանին բռնակցել Արցախի Հանրապետության օրինական տարածքները: Հայաստանի, ինչպես նաև որևէ այլ պետության բարձրաստիճան պաշտոնյաների նման պատրաստակամությունը եւ ԼՂՀ-ի տարածքներին առնչվող որեւէ համաձայնեցված կամ ստորագրված փաստաթղթերը միջազգայն իրավունքի տեսանկյունիցետից առոչինչ են` այսինքն չունեն եւ չեն էլ կարող ունենալ որևէ իրավական հետևանք Արցախի եւ արցախահայության համար: Միաժամանակ իշխանությունների կողմից որդեգրած նման քաղաքականությունը իր  մեջ պարունակում է  բազմաթիվ վտանգներ` խաթարելով  տարածաշրջանում  կայունությունը եւ Հայաստանի անվտանգությունն ու ապագան: Կոչ եմ անում ՀՀ գործող նախագահին եւ իրեն սատարող քաղաքական ուժերին` 1.    Վերջ դնել Արցախի Հանրապետության տարածքային ամբողջականության եւ արցախահայության ինքնորոշման իրավունքի ոտնահարմանը: 2.    Խստորեն պահպանել միջազգային իրավունքի նորմերը Արցախի` որպես երկրորդ հայկական պետության եւ որպես միջազգային իրավունքի լիիրավ սուբյեկտի  նկատմամբ: 3.    Հիմք ընդունելով ԼՂՀ-ի կայացման օրինականությունը, եւ համաձայն ՀՀ միջազգային պայմանագրերի մասին օրենքի` ԼՂՀ-ի` որպես միջազգային իրավունքի սուբյեկտի հետ  հաստատել երկկողմանի միջպետական պայմանագրային հարաբերություններ : 4.    ճանաչել ԼՂՀ-ն եւ օժանդակել նրա` միջազգային ճանաչմանը: Միաժամանակ նման քայլերը հայ-թուրքական, ինչպես նաեւ` հարեւան մյուս պետությունների հետ հարաբերությունների զարգացման ընթացքում ի սպառ կբացառեն Արցախի տարածքային ամբողջականության, ժողովրդի անվտանգության եւ Հայաստանի  հետ գոյություն ունեցող ընդհանուր սահմանի նկատմամբ որեւէ պետության կողմից նկրտումները: Արցախի իշխանություններին ու ժողովրդին կրկին կոչ ենք անում. «Անսասան կանգնեք եւ պաշտպանեք ազգային - ազատագրական պայքարով ձեռք բերած Ձեր նվաճումները` քաջ գիտակցելով, որ Ձեզ սատարում է համայն հայությունը»: