Արագածոտնի մարզում էր Սվերդլովսկի պատվիրակությունը
Երեկ Արագածոտնի մարզի Աշտարակ քաղաք էր այցելել Ռուսաստանի Դաշնության Սվերդլովսկի Երկրամասի պատվիրակությունը: Ռուսական կողմի պատվիրակության ղեկավարը Օրենսդիր ժողովի մարզային դումայի նախագահ Նիկոլայ Վորոնինն էր: Այցը համագործակցության նպատակ է հետապնդում Արագածոտնի մարզի հետ:
Մարզպետ Սարգիս Սահակյանի հետ հանդիպման ժամանակ Ն. Վորոնինը ներկայացրեց այն հեռանկարային ծրագրերը, որոնք նախատեսված են ռուսական կողմի եւ Արագածոտնի մարզի հետ համագործակցության շրջանակներում: Ռուս պաշտոնյան մասնավորապես առանձնացրեց գյուղատնտեսական մթերքների իրացման կազմակերպման հնարավորությունը իրենց երկրամասում:
Գյուղատնտեսության ոլորտը պատվիրակության ղեկավարին էլ ավելի գրավեց` համտեսելով մարզպետարանում կազմակերպված գյուղատնտեսական ցուցահանդեսում ներկայացված կաթնամթերքի, տարբեր պահածոների, գինիների ու կոնյակների եւ այլ տեսականիները: «Մինի» ցուցահանդեսում ներկայացված էին «Աշտարակ կաթ», «Թամարա ֆրուտ», «Աշտարակյան գինիներ» եւ այլ ձեռնարկությունները: Հյուրերին հետաքրքրեց նաեւ «Միկրոմ» ՍՊԸ-ի գործունեությունը: Նշենք, որ ընկերությունը զբաղվում է դպրոցների լաբորատորիաների համար ֆիզիկայի սարքավորումների, օրգանական պիգմենտների եւ համանման այլ տեսականիների արտադրությամբ:
Պաշտոնական հանդիպումներից հետո Ն. Վորոնինի գլխավորած պատվիրակությունը մարզպետ Սարգիս Սահակյանի եւ ԱԺ պատգամավոր Լյովա Խաչատրյանի ուղեկցությամբ այցելեց Օշականի սբ. Մ. Մաշտոց եկեղեցի, կատարեց մոմավառություն եւ ծաղկեպսակներ դրեց Մեսրոպ Մաշտոցի գերեզմանին:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել