Մի քանի ժամ առաջ Մոսկվայի Կաշիրյան պողոտայում գտնվող մասնավոր հիվանդանոցում մահացել է հանցավոր աշխարհում թերևս ամենահեղինակավոր «օրենքով գող» Վյաչեսլավ Իվանկովը` Յապոնչիկը: Ռուսական լրատվամիջոցների հաղորդմամբ` «օրենքով գողի» առողջությունն այդպես էլ չի վերականգնվել մոտ երկու ամիս առաջ նրա նկատմամբ կատարված մահափորձից հետո: Հիշեցնենք, որ հուլիսի 28-ի երեկոյան «Թայլանդական սրահ» ռեստորանի մոտ վարձու մարդասպանը` օպտիկական նշանառությամբ դիպուկահարի զենքով, «Գազել» մակնիշի ավտոմեքենայից կրակել էր քրեական հեղինակության վրա: Որովայնի շրջանում ստացած հրազենային վնասվածքով` 69-ամյա Վյաչեսլավ Իվանկովը ծանր վիճակում տեղափոխվել էր Մոսկվայի Բատկինյան հիվանդանոցի վերակենդանացման բաժանմունք: Սկզբում բժիշկներն ասել էին, որ նման վնասվածքը սովորաբար անհամատեղելի է կյանքի հետ, բայց վստահեցրել էին, որ Յապոնչիկի կյանքին վտանգ չի սպառնում: Սակայն ավելի ուշ «օրենքով գողի» վիճակը ծանրացել էր: Կատարված մահափորձի առթիվ նախաքննությունը շարունակվում է: Դեռևս պաշտոնապես որևէ վարկած չի հաստատվել: Սակայն, ըստ ռուսական լրատվամիջոցների, ամենահավանական վարկածն այն է, որ Յապոնչիկն ակտիվ մասնակցություն է ունեցել հանրահայտ երկու «օրենքով գողերի» ` Դեդ Հասանի (ազգությամբ եզդի Ասլան Ուսոյան) և Տարիել Օնիանիի (ազգությամբ վրացի) խմբավորումների միջև տեղի ունեցող «ռազբորկային»: Այդ հակամարտությունում, «Criminalnaya.ru»-ի փոխանցմամբ, Վյաչեսլավ Իվանկովը պաշտպանել է Ասլան Ուսոյանին: