«Deno Gold Mining Company» ՓԲԸ-ն պատրաստվում է կոնսերվացնել Կապանի կենտրոնական հանքավայրը, հրաժարվել այն շահագործելու արտոնագրից եւ  հանքը  հանձնել պետությանը: Այդ հարցը երկու անգամ քննարկվեց Կապանում՝ առաջին անգամ սեպտեմբերի 28-ին՝ Կապանի Օրհուս կենտրոնում, երկրորդ անգամ՝ հոկտեմբերի 9-ին՝ Կապանի քաղաքապետարանում: Շահագործման արտոնագիրն ընկերությանը տրվել է 2006 թ.: Հանքի շահագործումը սկսվեց 2007թ. եւ շարունակվեց  մինչեւ 2008 թ. օգոստոսի վերջը: Այդ ընթացքում հանքարդյունահանման ծավալը կազմել է 79 342 տ: Ըստ «Deno Gold Mining» ընկերության ներկայացուցիչ Հասմիկ Մկրտումյանի՝ հանքի պաշարներն  ամբողջապես մարված չեն եւ դեռեւս ենթակա են շահագործման: Խնդիրն այն է, որ «Deno Gold Mining Company» ՓԲԸ-ն ունի մեկ արտոնագիր՝ միանգամից երեք՝ Կենտրոնական, Շահումյան եւ Թեջադին հանքավայրերի շահագործման համար: Սակայն ընկերությունը հրաժարվում է միայն Կենտրոնական հանքավայրից: Ընդ որում` Կենտրոնական հանքավայրը հանձնվում է պետությանը, իսկ 5 հա հողի վրա գտնվող շենք-շինությունները, պետական կադաստրային վկայականներով, ընկերությանն են պատկանում: Քննարկման ընթացքում հարց բարձրացվեց, թե ինչպե՞ս պետք է մեկ այլ կազմակերպություն շահագործի Կենտրոնական հանքավայրը, եթե այն սպասարկող ենթակառուցվածքներն ու ֆաբրիկան «Deno Gold Mining Company» ՓԲԸ-ի սեփականությունն են: Ինչպես կարծում է տեղի «էկոլոգիական անվտանգության ապահովման եւ ժողովրդավարության զարգացման» ՀԿ-ն, ընկերության վարած քաղաքականությունն արդեն Կապանում հանգեցնում է ծանր սոցիալական հետեւանքների: Իսկ ինչ վերաբերում է Կենտրոնական հանքավայրի կոնսերվացմանը, ապա առաջ է գալիս հարցերի մի ամբողջ շարք՝ հանքի անարդյունավետ շահագործման վերաբերյալ: «Բնապահպանության նախարարության եւ Սյունիքի մարզի բնապահպանական տարածքային տեսչության չեզոք վերաբերմունքը  ընկերության նկատմամբ անհանգստացնում է մեզ ողջ տարածաշրջանի համար իր գլոբալ ծանր էկոլոգիական հետեւանքներով, ինչը կարող է անլուծելի խնդիր դառնալ մոտ ապագայում»,- նշված է ընկերության հայտարարության մեջ: «ԷկոԼուր» տեղեկատվական ՀԿ