Փոխվարչապետ, տարածքային կառավարման նախարար Արմեն Գեւորգյանն այսօր մեկնել է Շիրակի մարզի Հովտաշեն համայնք` տեղում ծանոթանալու համայնքների խոշորացման վերաբերյալ ավագանու անդամների եւ բնակիչների կարծիքներին ու մտահոգություններին: Հիշեցնենք, որ մեկ շաբաթ առաջ Արմեն Գեւորգյանի մոտ տեղի ունեցած միջգերատեսչական հանձնաժողովի հերթական նիստում Համայնքների խոշորացման հարցերի աշխատանքային խումբը ներկայացրել էր համայնքների խոշորացման փորձնական 3 ծրագրեր` Գեղարքունիքի, Սյունիքի եւ Շիրակի մարզերում: Դրանցից մեկով առաջարկվում է խոշորացնել Շիրակի մարզի Հովտաշեն եւ Հոռոմ համայնքները: ՏԿՆ մամլո ծառայության փոխանցմամբ` Արմեն Գեւորգյանը հովտաշենցիներին, համայնքի ավագանու անդամներին, Հովտաշենի եւ Հոռոմի համայնքապետերին նախ ծանոթացրել է համայնքների խոշորացման եւ միջհամայնքային միավորումների ձեւավորման հայեցակարգին, տեղեկացրել, թե ինչ մեխանիզմներ կգործեն համայնքների խոշորացման գործընթացում: Կողք-կողքի գտնվող, ընդամենը մեկ ճանապարհով բաժանվող երկու գյուղերը` մոտ 300 բնակչություն ունեցող Հովտաշենը եւ ավելի քան 2400 բնակչություն ունեցող Հոռոմը, արդեն իսկ ընդհանրություններ ունեն: Հովտաշենցի շատ երեխաներ սովորում են Հոռոմի դպրոցում: Մի համայնքի բնակիչ աշխատում է մյուս համայնքում եւ այլն: Այնուամենայնիվ, հատկապես փոքրաթիվ բնակչություն ունեցող Հովտաշենի բնակիչները մտավախություններ ու մտահոգություններ ունեն, որոնք ներկայացրել են փոխվարչապետին: Արմեն Գեւորգյանը հովտաշենցիներին հավաստիացրել է, որ համայնքների խոշորացման արդյունքում իրենք որեւէ հարցում չեն տուժի, առաջվա պես կշարունակեն տնօրինել իրենց հողատարածքները: Փոխվարչապետին առաջարկվել է համայնքների խոշորացման այս ծրագրում ընդգրկել նաեւ Սարատակ եւ Լուսակերտ մոտակա գյուղերը: Արմեն Գեւորգյանը խոստացել է առաջարկը ներկայացնել ՀՀ համայնքների խոշորացման եւ միջհամայնքային միավորումների ձեւավորման հայեցակարգի, ինչպես նաեւ միջոցառումների ծրագրերի վերջնական լրամշակման գործընթացը կազմակերպող միջգերատեսչական հանձնաժողովի քննարկմանը: