ԱՄՆ Սենատում Ցեղասպանության ճանաչման նոր բանաձևը ինչ-որ տեղ բողոքի արտահայտություն է Հայաստան-Թուրքիա արձանագրություններում առկա պատմական հարթության վրա հարցեր քննարկող միջկառավարական ենթահանձնաժողովին: Այսօր «Հայացք» մամուլի ակումբում բանաձևի մուտքը ԱՄՆ Սենատ այսպես մեկնաբանեց ՀՅԴ Հայ դատի  և քաղաքական հարցերի գրասենյակի պատասխանատու Կիրո Մանոյանը: Հիշեցնենք, որ սենատորներ Ռոբերտ Մենենդեզը և Ջոն Էնսայնը հոկտեմբերի 21-ին ԱՄՆ Սենատ են ներկայացրել Հայոց ցեղասպանության ճանաչման ու դատապարտման բանաձև: Այն նման է Ներկայացուցիչների պալատին ներկայացրած թիվ 252 օրինագծին, որի համահեղինակներն են կոնգրեսականներ Ադամ Շիֆը, Ջորջ Ռադանովիչը, Կոնգրեսում Հայկական հարցերով հանձնախմբի համանախագահներ Ֆրանկ Փալոունը և Մարկ Քըրքը: 252-րդ բանաձևը մինչ օրս 130 աջակից ունի: «Բանաձևը ներկայացվել է Սպիտակ տան վրա հավելյալ ճնշում գործադրելու համար, որպեսզի Սպիտակ տունը Ցեղասպանության ճանաչման վերահաստատումը Միացյալ Նահանգների կողմից անջատի Հայաստան-Թուրքիա հարաբերություններից»,- հավելեց բանախոսը: Կիրո Մանոյանը հիշեց, որ նոր բանաձևի գլխավոր հեղինակը` Սենատոր Ռոբերտ Մենենդեզը հարցականի տակ էր դնում Ցեղասպանության փաստը: Այն շրջանակները, որոնք կողմնակից չէին Ցեղասպանության ճանաչմանը ինչ-ինչ շահերից ելնելով, այսօր այս արձանագրությունները առավելագույնս օգտագործում են` ասելով, որ դրանք արդեն փաստ են, որ Հայաստանը ևս հարցականի տակ է դնում Ցեղասպանության փաստը: «Սա նշանակում է, որ ՀՀ արտգործնախարարության դիվանագիտությունը, դեսպանատները շատ ակտիվ պիտի աշխատեն»,- եզրակացրեց բանախոսը: Եթե այս ընթացքի առաջը չառնենք, ըստ Կիրո Մանոյանի, Ցեղասպանության 95-ամյակի նախօրեին թուրքական ցունամու դեմն առնելը դժվար կլինի: