Հոդվածի հեղինակը դատարան չէր եկել
Հրաչ Քեշիշյանն ընդդեմ «Հրապարակ» օրաթերթի դատական գործը կրկին հետաձգվեց
Այսօր Կենտրոն եւ Նորք-Մարաշ համայնքների ընդհանուր իրավասության դատարանում շարունակվեց Հրաչ Քեշիշյանն ընդդեմ «Հրապարակ» օրաթերթի հայցադիմումի քննությունը: Հանրային հեռուստաընկերության պրոդյուսեր, ռեժիսոր Հրաչ Քեշիշյանը օրաթերթից պահանջում է 5 մլն դրամ` որպես բարոյական վնասի հատուցում: Իսկ բարոյական վնասը, ըստ Քեշիշյանի, իրեն հասցվել է իր մասին «Հրապարակի» տպագրած հոդվածով:
Ըստ հոդվածի` գոյություն ունի ինտիմ կադրեր պարունակող տեսանյութ, որի գլխավոր գործող անձը Հրաչ Քեշիշյանն է` զուգընկերուհու հետ: Ռեժիսորը պնդում է, որ տեսանյութի «հերոսը» ինքը չէ եւ պահանջում է հերքել այդ տեղեկությունը:
Այսօրվա դատական նիստին չէր ներկայացել հոդվածի հեղինակը` Լենա Լազարյանը, քանի որ պատշաճ ծանուցված չէր դատական նիստի անցկացման օրվա մասին: Դատավոր Ռուբեն Ներսիսյանն ասաց, որ գրություն կուղարկեն «Հրապարակ» ՍՊԸ-ի տնօրինությանը, որպեսզի վերջիններս պատշաճ կերպով ծանուցեն Լենա Լազարյանին: Գործի քննությունը կշարունակվի նոյեմբերի 6-ին:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել