Նախագահ Սերժ Սարգսյանին իր հավատարմագրերն է հանձնել Հայաստանում Նիդեռլանդների Թագավորության նորանշանակ դեսպան Պիտեր Յան Լանգենբերգը (նստավայրը` Թբիլիսի): Սերժ Սարգսյանն ասել է, որ Հայաստանը շահագրգռված է խորացնել հարաբերությունները Նիդեռլանդների հետ բոլոր ոլորտներում: Այդ գործում մեծ դերակատարություն վերապահելով դեսպաններին` նա հույս է հայտնել, որ պարոն Լանգենբերգը ակտիվ կլինի եւ փոխգործակցության շրջանակն ընդլայնելու ուղղությամբ կձեռնարկի նոր քայլեր: Նախագահի մամլո ծառայության փոխանցմամբ` Ս. Սարգսյանը բարձր է գնահատել անկախությունից ի վեր Նիդեռլանդների ցուցաբերած աջակցությունը Հայաստանի տնտեսության զարգացմանը, ինպրես նաեւ ընդգծել է Համաշախարհային բանկի եւ Արժույթի միջազգային հիմնադրամի «Հոլանդական խմբի» շրջանակում երկու երկրների միջեւ հաջողությամբ զարգացող համագործակցությունը: Կողմերն անհրաժեշտ են համարել ոչ միայն երկկողմ, նաեւ բազմակողմ ձեւաչափով հարաբերությունների խորացումը` ԵՄ «Արեւելյան գործընկերության» ծրագիրը դիտարկելով դրան ուղղված կարեւոր գործընթաց: Դեսպան Լանգենբերգի խնդրանքով Նախագահ Սարգսյանը ներկայացրել է նաեւ Հայաստանի մոտեցումները Լեռնային Ղարաբաղի հիմնախնդրի բանակցային գործընթացի, հայ-թուրքական հարաբերությունների կարգավորման վերաբերյալ: