Թերթը գրում է, որ 2009-ի հուլիսից մինչեւ 2011-ի հուլիսը Բելգիայի Թագավորությունում Հայաստանի դեսպանատան երկրորդ քարտուղար Մուշեղ Մկրտչյանը Facebook-ի իր էջում վերջերս կարճ գրառում է կատարել, որտեղ անդրադարձել է բելգիայում ՀՀ արտակարգ եւ լիազոր դեսպան, ԲՀԿ-ական Ավետ Ադոնցի գործունեությանը, որը մինչ այս եղել է նաեւ ՀՀ ԱԺ Եվրոպական ինտեգրման հարցերի մշտական հանձնաժողովի նախկին նախագահն ու ԵԽԽՎ-ում հայաստանյան պատվիրակության ԲՀԿ-ական անդամը եւ Հայաստանի ներքաղաքական իրավիճակը խեղաթյուրված ներկայացնելու ջատագովներից մեկն էր: 

Թերթը նշում է, որ իր նոր պաշտոնում էլ Ադոնցն իրեն ամենեւին էլ վատ չի զգում, եւ շարունակելով ԷԽԽՎ-ում հայաստանյան պատվիրակության անդամ եղած ժամանակների գործունեությունը, ձեռի հետ էլ նաեւ զբաղված է ամենատարբեր գործունեություններով՝ կամերային նվագախմբի տոմսեր վաճառելուց մինչեւ աշխատողներից գումարների շորթում եւ ապատեղեկատվության տարածում:

Մ. Մկրտչյանի խոսքով՝ դեսպան Ադոնցը Պետական երիտասարդական նվագախմբի համերգի տոմսերի իրացմամբ է զբաղված: «Ս. Սարգսյանի նկարի տակ տեղ է զբաղեցրել համերգի դահլիճի սխեման: Դեսպանն անձամբ ջնջում է վաճառված տեղերը»,- ասել է Մկրտչյանը:

Բացի այդ՝ ըստ կայքի գրառման, Ադոնցը չի զլացել անգամ յուրացնել հայկական պատվիրակությանը դիմավորելու համար նախատեսված ավտոմեքենաների լվացման փողը՝ 28 եվրոյի փոխարեն վճարելով 20 եվրո: