Երեկ ԼՂՀ Նախագահ Բակո Սահակյանն  ընդունել է Հայաստանի Հանրապետության առողջապահության նախարար Հարություն Քուշկյանին: Ինչպես հայտնում են նախագահի աշխատակազմի տեղեկատվության գլխավոր վարչությունից, հանդիպմանը, որին մասնակցում էր նաեւ ԼՂՀ առողջապահության  նախարար Արմեն Խաչատրյանը, քննարկվել  են առողջապահության ոլորտում երկու  հայկական պետությունների համագործակցության ներկա վիճակը եւ հեռանկարները: Առանձնակի ուշադրություն էր դարձվել մայրաքաղաքի հանրապետական հիվանդանոցի կառուցման հետ կապված հարցերին: Նախագահը, կարեւորելով բժշկական այս  համալիրի նշանակությունը  Արցախի համար, հավելել է, որ նրա հետագա աշխատանքի արդյունավետությունը մեծապես կախված է լինելու նաեւ Հայաստանի առողջապահական համակարգի հետ փոխգործակցությունից: