ԼՂՀ Հադրութի շրջանի Մեծ Թաղլար եւ Ազոխ համայնքներում «Հայաստան» համահայկական հիմնադրամը շահագործման է հանձնել շուրջ 16 կմ երկարությամբ նորակառույց ջրագիծը, որը կսպասարկի համայնքների ավելի քան 2300 բնակչի: Ծրագիրը համաֆինանսավորում են Հիմնադրամի Ֆրանսիայի տեղական մարմինն ու ԼՂՀ կառավարությունը: Հիմնադրամի մամլո ծառայության փոխանցմամբ` Բացման հանդիսավոր արարողությանը ներկա են եղել ԼՂՀ վարչապետ Արայիկ Հարությունյանը, կառավարությանն առընթեր կապիտալ շինարարության վարչության պետ Կարեն Շահրամանյանը, կրթության նախարար Վլադիկ Խաչատրյանը, հիմնադրամի գործադիր տնօրեն Արա Վարդանյանը, փոխտնօրեն Արարատ Խլղաթյանը և այլք: «Հիմնադրամի գործունեության մեջ առաջնային կարեւորության ոլորտները մի քանիսն են, սակայն չկա ավելի մեծ ձեռքբերում, քան հեռավոր գյուղերի բնակչությանը խմելու ջրով ապահովելը»,- իր շնորհավորական խոսքում նշել է «Հայաստան» համահայկական հիմնադրամի գործադիր տնօրեն Արա Վարդանյանը: «Մենք հարյուր տարի ջուր չենք ունեցել», - մինչ ժապաավենը կտրելն ասել է Մեծ Թաղլարի տարեց բնակչուհին եւ արարողությունը սկսել մոմավառությամբ: Ջրատարը սնվում է Իշխանագետից: Աղբյուրի հաղորդմամբ` շինարարները վստահեցնում են, որ ջրընդունիչ կառույցը, պարզարանը, ջրի մաքրման ֆիլտրը կապահովեն ջրի մաքրությունն ու որակը, իսկ մետաղական խողովակներն ու փականները` ջրատարի անխափան աշխատանքը: Ազոխ համայնքի ղեկավար Գեւորգ Գեւորգյանի խոսքով` խմելու ջրի հարցը տարիներ շարունակ քիչ թե շատ կարգավորվում էր, երբ տեղումներ էին լինում: «Ջրի առկայությունն էապես կփոխի գյուղացիների կենցաղը: Բոլորի անունից շնորհակալություն եմ հայտնում Լեռնային Ղարաբաղի կառավարությանն ու Հիմնադրամին», - ասել գյուղապետը: Հիմնադրամի փոխտնօրեն Արարատ Խլղաթյանի տեղեկացմամբ` մինչեւ տարեվերջ կավարտվի նաեւ ջրագծի Դրախտիկ համայնքի 6 կմ երկարությամբ հատվածը: Ընդհանուր առմամբ Մեծ Թաղլար, Ազոխ եւ Դրախտիկ համայնքներում ապրում է շուրջ 2750 բնակիչ, որի հիմնական զբաղմունքը հողագործությունն ու անասնապահությունն է: Ջրատարի բացման արարողությանը հետեւել է Հիմնադրամի մեկ այլ` Սպիտակաշենի նորակառույց դպրոցի բացման արարողությունը: Հովանավորող կողմի եւ ծրագրի բարերարների այցով պայմանավորված` դպրոցի պաշտոնական բացումը տեղի կունենա 2010 թ. մայիսին: