H1N1 գրիպի հնարավոր համաճարակի դեմ միջոցառումների կազմակերպման  նպատակով այսօր ԼՂՀ կառավարության որոշմամբ ստեղծվեց հանրապետական հանձնաժողով, որը կգլխավորի հանրապետության վարչապետ Արա Հարությունյանը: Ինչպես կառավարության այսօրվա նիստում ներկայացրեց առողջապահության նախարար Արմեն Խաչատրյանը, հանձնաժողովի ստեղծումը բխում է հանրապետություն հատուկ վտանգավոր վարակի ներթափանցման ու տարածման կանխարգելման անհրաժեշտությունից: Այդ նպատակով հանձնաժողովը պետք է մշակի H1N1 գրիպի հնարավոր համաճարակի դեմ միջոցառումների ծրագիր եւ ներկայացնի կառավարությանը: Ինչպես Հետքի հետ հեռախոսազրույցում տեղեկացրեց ԼՂՀ առողջապահության նախարար Արմեն Խաչատրյանը, այսօրվա դրությամբ Ղարաբաղում H1N1 գրիպի վարակման դեպք չի գրանցվել: