Երեկ տեղի է ունեցել Ազգային մրցունակության հիմնադրամի(ԱՄՀ) հոգաբարձուների խորհրդի 13-րդ նիստը:  Վարչապետ, հիմնադրամի հոգաբարձուների խորհրդի նախագահ Տիգրան Սարգսյանը ԱՄՀ խորհրդի անդամներին ներկայացրել է 2009 թ. կառավարության հակաճգնաժամային գործունեության արդյունքները, ինչպես նաեւ 2010 թվականի բյուջեով նախատեսվող ծրագրերը և «Արմթեք-2009»-ի այցելություններից տպավորությունները։ Ըստ կառավարության կայքէջի՝ ՀՀ կառավարության ղեկավարը մասնավորապես նշել է. «Ժամանակակից աշխարհը փոխել է մրցակցության հայեցակարգը։ Ինդուստրիալ հասարակության կանոնները` մրցակցային, հետինդուստրիալ հասարակությունում այլեւս չեն աշխատում։ Ժամանակակից տեխնոլոգիաները լուծում են բազմաթիվ խնդիրներ, այդ թվում նաև` սոցիալական խնդիրներ։ Ժամանակակից տեխնոլոգիաները, մխրճվելով հասարակական հարաբերությունների ոլորտ, փոխում են հասարակությունների արժեքային համակարգերը։ Այս երևույթը մեր լրջագույն քննարկման առարկան պետք է լինի»։ «Ո՞րն է Հայաստանի Հանրապետությունում թռիչքաձեւ զարգացում ապահովելու և համահայկական կառույցներին դրա շուրջ հավաքելու բանաձեւը», ահա հարցը, որի պատասխանի քննարկմանն է հրավիրել ներկաներին ՀՀ վարչապետը։ Տիգրան Սարգսյանը հիշեցրել է «Արմթեք-2009»-ի ընթացքում հնչած ձևակերպումներից մեկը` «անցյալն այսօրն է, իսկ ապագան վաղն է»։ «Դա պարտավորեցնում է աշխատել ավելի արագ, քանզի հայկական աշխարհի հայեցակարգը թարմացման կարիք ունի», նշել է վարչապետը։ Այնուհետեւ, նիստի օրակարգի շրջանակներում քննարկվել են Հայաստանի և համաշխարհային տնտեսության առկա զարգացումների վերաբերող հարցեր։ Քննարկման առարկա են դարձել Սփյուռքի հետ համագործակցության ռազմավարությունները և Սևանի բարձրադիր պայմաններում համապատասխան սպորտաձևերի` որպես նոր զբոսաշրջային ապրանքի ձևավորման հնարավորությունները։ Այս մասին զեկույցներով հանդես են եկել Իռլանդիայի Ազգային Համալսարանի պրոֆեսորներ Ռոբ Քիթչինն ու Մարկ Բոյլը, ինչպես նաեւ Մյունխենից ժամանած հյուրերը` սպորտի և զբոսաշրջության փորձագետներ Պետեր Գոթվալդը և Ֆրանկ Դանիել Էհրսամը։ Օրակարգի թեմաներից են եղել նաև համահայկական ցանցի նախագծի աշխատանքային պլանավորումը և համահայկական բանկի ծրագրի հաշվետվությունների ներկայացումը, հիմնադրամի ընթացիկ աշխատանքների հետ կապված այլ հարցեր։