Կառավարությունն այսօրվա նիստում ֆինանսների նախարարին նաև պարտավորեցրել է ՄՌԼՀ-11 մայրուղային ռադիոլոկացիոն համակարգի վերակառուցման նպատակով այս տարվա չորրորդ եռամսյակում պետբյուջեից «Հայաերոնավիգացիա» ՓԲԸ-ին տրամադրել 1 միլիոն եվրոյին համարժեք դրամ բյուջետային վարկ` 4 տարի մարման ժամկետով, Լոնդոնի միջբանկային բորսայում վեցամսյա ԱՄՆ դոլարով դեպոզիտների համար սահմանված տարեկան տոկոսադրույքին գումարած 4 (Լիբոր+4) տոկոսին համարժեք դրույքաչափով, բայց ոչ պակաս տարեկան 12 տոկոսից։ Ըստ կառավարության մամլո գրասենյակի` որպես վարկային պարտավորության ապահովման միջոց որոշվել է գրավ ընդունել վերոհիշյալ վերակառուցվող մայրուղային ռադիոլոկացիոն համակարգը, ինչպես նաեւ «Հայաերոնավիգացիա» ՓԲԸ-ին պատկանող ռադարային վայրէջքային, երկու միավոր կապի ձայնային համակարգերը եւ «Աշտարակ» Կ.Կ. դիսպետչերի ավտոմատացված աշխատատեղը իր ծրագրային ապահովմամբ։ Հատկացվող վարկի ֆինանսավորման աղբյուրն է Ռուսաստանի Դաշնության կողմից Հայաստանի Հանրապետությանը 2009 թ. տրամադրված պետական վարկը։