«Կոշիկի քաղաք» ընկերության սեփականատեր, գործարար, ՀՀ մաքսային կոմիտեի նախկին նախագահ Ա.Ավետիսյանի տան վրա տեղի ունեցած ավազակային հարձակման քրգործով ամբաստանյալ Արա Կարապետյանը կարող է հացադուլ հայտարարել: Այս մասին երեկ «ՀԺ»-ի թղթակցին ասել է Կարապետյանի փաստաբան Արա Զաքարյանը:

Կարապետյանը երկու շաբաթ առաջ վիրահատվել է, որի ընթացքում բարդացումներ են եղել: «Դատապարտյալների հիվանդանոց» ՔԿՀ վարչակազմը, որտեղ բուժվում է Կարապետյանը, որոշել է, որ նրան կարելի է դուրս գրել և տեղափոխել «Նուբարաշեն» ՔԿՀ:

ՀՀ ՔԿՎ բժշկական աշխատանքային հանձնաժողովը այս մոտեցումը չի հաստատել և երեկ որոշել է, որ գործարարը ևս մեկ շաբաթ պետք է բուժվի: «Դատապարտյալների հիվանդանոց» ՔԿՀ վարչակազմն էլ իր հերթին որոշել է, որ Կարապետյանի ռեժիմը պետք է փոխվի, բաց ռեժիմից նրան տեղափոխել են փակ ռեժիմ:

Ըստ Զաքարյանի՝ փակ ռեժիմը ծանր հետևանք կարող է ունենալ գործարարի առողջական վիճակի վրա, և եթե ռեժիմը չփոխեն, հնարավոր է՝ նա անժամկետ հացադուլ հայտարարի: «Սա խոշտանգում է, որի նպատակը նրան լռեցնելն է»,- ասել է փաստաբանը: