Տավուշի մարզի դատախազությունում հարուցվել է քրեական գործ` ոստիկանության` Տավուշի մարզային վարչության ուղեկցող ջոկի հրամանատարի նկատմամբ` պաշտոնեական կեղծիքի, փաստաթղթեր կեղծելու եւ սուտ ցուցմունք տալու դեպքի առթիվ: Պարզվել է, որ Տավուշի մարզի Գետահովիտ գյուղի բնակիչ, ոստիկանության` Տավուշի մարզային վարչության ուղեկցող ջոկի հրամանատար, ոստիկանության ենթասպա Ս. Ենգիբարյանը, նախնական համաձայնության գալով Գետահովիտ գյուղի գյուղապետ Ս. Ղազարյանի եւ գյուղապետարանի քարտուղար Կ. Դավթյանի հետ, կազմել է իրականությանը չհամապատասխանող, ակնհայտ կեղծ տեղեկանքներ եւ  նախկին գյուղխորհրդի գործկոմի որոշման կեղծ քաղվածք: Հիշյալ կեղծ փաստաթղթերը Իջեւան քաղաքի «Արցախ» ռեստորանին հարակից 0.8 հա հողամասի նկատմամբ իր սեփականության իրավունքը  ճանաչելու հայցադիմումի հետ Ս. Ենգիբարյանը  ներկայացրել է Տավուշի մարզի ընդհանուր իրավասության դատարան: Այնուհետեւ  որպես հայցվոր հանդես է եկել դատարանում եւ շահադիտական նպատակներով սուտ ցուցմունք տվել` ներկայացնելով արհեստական ապացույցներ: Ըստ Գլխավոր դատախազության կայքէջի՝ փաստի առթիվ Տավուշի մարզի դատախազությունում  հարուցվել է քրեական գործ` ՀՀ քրեական օրենսգրքի 314-րդ հոդվածի 1-ին, 325-րդ հոդվածի 2-րդ, 38-325-րդ հոդվածի 2-րդ եւ 338-րդ հոդվածի 2-րդ մասի 2-րդ եւ 3-րդ կետերով: Քրական գործը ըստ քննչական ենթակայության  ուղարկվել է  հատուկ քննչական ծառայություն` նախաքննություն կատարելու: