«Ժառանգություն» կուսակցության վարչության նախագահ Արմեն Մարտիրոսյանն այսօր «Հայացք» ակումբում տեղի ունեցած մամուլի ասուլիսի ժամանակ անդրադարձավ Մյունխենում կայացած Սարգսյան-Ալիև հանդիպմանը` նշելով, որ մյունխենյան հանդիպումից շատ մեծ սպասելիքներ պետք չէր ունենալ: «Դեռևս հայ-թուրքական արձանագրությունների համատեղ հայտարարման ժամանակ  մենք նշեցինք, որ Լեռնային Ղարաբաղի հարցն առկա է այդ արձանագրություններում, և այդպես էլ տեղի  է ունենում բանակցության պրոցեսում»,- ասաց նա` նշելով, որ քանի դեռ հայ-թուրքական  արձանագրությունների հետ կապված բոլոր խնդիրները չեն լուծվել, ղարաբաղյան խնդրի հետ կապված փաստաթուղթ իշխանությունները չեն ստորագրի: «Հակառակ դեպքում` ընդհանրապես որևէ կերպ հնարավոր չէր լինի իշխանությունը պահպանել: Կարծում եմ` հայ-թուրքական հարաբերությունները կյանքի կոչելուց որոշ ժամանակ անց նոր տեղի կունենա Լեռնային Ղարաբաղի հետ կապված փաստաթղթի ստորագրում և դրա կյանքի կոչելու գործընթաց: Կարծես թե խոսք է գնում ազատագրված տարածքների հանձնման մասին, և բացառությամբ Լաչինի միջանցքի և ոչ թե շրջանի, պետք է ազատագրված տարածքները մեր իշխանությունների ակտիվ մասնակցությամբ հանձնվեն ադրբեջանական կողմին»,- ասաց նա` նշելով, որ «Ժառանգության» համար սա միանշանակ անընդունելի է, քանի որ ազատագրված տարածքները Լեռնային Ղարաբաղի անբաժանելի մասն են: Անդրադառնալով Մոսկվայում կայացած Հայաստանի և Թուրքիայի ազգային ժողովների նախագահների հանդիպմանը` Ա. Մարտիրոսյանը նշեց, որ ինքը դրական է գնահատում հանդիպումը, ողջունում է ցանկացած պետությունների երկորդ դեմքերի հանդիպումները, հատկապես` եթե զրուցելու նյութ կա: «Ինչ վերաբերում է արձանագրությունների վավերացման հետ կապված արտահայտությանը, ապա մեզ համար անընդունելի են արձանագրությունները, որովհետև այնտեղ կան նախապայմաններ, և միայն հայկական կողմն էր, որ զիջումներ կատարեց այս արձանագրությունների ընթացքում»,- ասաց նա: Ա. Մարտիրոսյանը մատնանշեց Թուրքիայի արտգործնախարար Դավութօղլուի հայտարարությունը, թե` թուրքական կողմն ինչ ցանկանում էր, ստացավ, այն է` սահմանի ճանաչումը: «Ե´վ Դավութօղլուն, և´ Ալիևը մի հետաքրքիր խնդրի վրա էին իրենց ուշադրությունը կենտրոնացրել, դա վերաբերում է Հայաստանի բնակչության թվաքանակին: Դավութօղլուն հայտարարել էր, որ Հայաստանն աղքատ երկիր է, մեծ արտագաղթ կա: Ալիևն էլ բերել է 1,7 միլիոն մարդ բնակվելու փաստը, և հիմնավորել, որ այս թվի պայմաններում հնարավոր չէ ազատագրված տարածքները բնակեցնել: Նա դա տեսել է որպես ազատագրված տարածքները վերջնականորեն հանձնելու ուղի»,-ասաց նա` նշելով, որ մեր ողջ քաղաքական դաշտը պետք է ուշադիր լինի այս վերլուծական գնահատականներին: