Այսօր երկօրյա պաշտոնական այցով Հայաստան կժամանի Լեհաստանի Ազգային պաշտպանության նախարար Բոգդան Կլիխի գլխավորած պատվիրակությունը: Ինչպես տեղեկացնում է Հայաստանի պաշտպանության նախարարության մամուլի ծառայությունը, այսօր երեկոյան ժամը 18.45-ին ՊՆ վարչական համալիրում տեղի կունենա պատվիրակության դիմավորման պաշտոնական արարողությունը, ապա` Լեհաստանի Ազգային պաշտպանության նախարար Բոգդան Կլիխի և Հայաստանի  պաշտպանության նախարար Սեյրան Օհանյանի հանդիպումը: Վաղը Բ. Կլիխը հանդիպումներ կունենա նաև վարչապետ Տ. Սարգսյանի, ԱԱԽ քարտուղար Ա. Բաղդասարյանի, ԱԳՆ փոխնախարար Կ. Ղազինյանի հետ, ինչպես նաև` կայցելի «Ծիծեռնակաբերդ» հուշահամալիր` հարգանքի տուրք մատուցելու Հայոց ցեղասպանության զոհերի հիշատակին: Վաղը ժամը 17.00-ին, «Զվարթնոց» օդանավակայանում Բ. Կլիխը կհանդիպի նաև լրատվամիջոցների ներկայացուցիչների հետ: