«Ես ուսանող եմ, բայց շատ եմ ուզում աշխատել, ունենալ այնպիսի աշխատանք, որը կկարողանամ համատեղել ուսմանս հետ, ունենալ իմ սեփական եկամուտը. շատ չէ, բայց գոնե որոշ չափով ինքս հոգամ իմ ծախսերը», - ասաց Սաթինե Միրզոյանը այսօր Հրազդան քաղաքի Կենտրոն թաղամասում անցկացված աշխատանքի տոնավաճառի ժամանակ: Սաթինեն 19 տարեկան է, սովորում է Երևանի պետական համալսարանի Արևելագիտության ֆակուլտետի 3-րդ կուրսում, բայց միևնույն ժամանակ աշխատանք է փնտրում: Նա արդեն ունի աշխատանքային փորձ. ամռան ամիսներին աշխատել է ճամբարում որպես ջոկատավար: 18-ամյա Արփինե Խաչատրյանն առաջին անգամ է մասնակցում նման միջոցառման: Նա ռեստորանում մենեջերի աշխատանք է փնտրում: Արփինեն ունի միջնակարգ կրթություն և համապատասխան աշխատանքային փորձ, բայց դեռևս չի գտել իր փնտրած աշխատանքը: Ըստ «Զբաղվածության պետական ծառայություն» գործակալության պետի տեղակալ Գարիկ Սահակյանի` Հրազդանում նման տոնավաճառ անցկացվում է առաջին անգամ: Սակայն անցած տարի նման միջոցառում կազմակերպվել է Կոտայքի մարզի Աբովյան քաղաքում: «Սա պետական ծրագիր է, և ամեն տարի անցկացնում ենք` կախված տվյալ մարզի աշխատաշուկայի տվյալներից: Հրազդանն ենք ընտրել, քանի որ այն մեծ արդյունաբերական քաղաք է, կան շատ գործազուրկներ, բայց առաջակվող աշխատատեղերը քիչ են»,- ասաց նա: «Արամազդ» երիտասարդական կենտրոնի ներկայացուցիչ Կարեն Ներսիսյանի խոսքերով` իրենք գործատուի դերում առաջին անգամ են մասնակցում նման տոնավաճառի. «Մեզ մոտ կա գործավարի և համակարգչային ցանցի սպասարկողի մեկական թափուր աշխատատեղ: Գործավարի աշխատատեղն արդեն լրացված է: Ընդունել ենք մեկի, ով ունի բարձրագույն կրթություն, բայց չունի աշխատանքային փորձ»,- ասաց նա: Միջոցառմանը մասնակցում էր նաև Կոտայքի մարզի միգրացիոն տեղեկատվական կենտրոնը: Ըստ կազմակերպության ներկայացուցիչ Հասմիկ Մնացականյանի` իրենց կազմակերպությունում գրանցված են 50-ից ավել աշխատանք փնտրողներ, որոնցից 10-ն արդեն աշխատանք են գտել: «Մենք միջնորդում ենք միգրանտներին գտնելու աշխատանք, եթե իրենք չեն կարողանում ինքնուրույն գտնել: Տրամադրում ենք իրավաբանական և սոցիալական անվճար խորհրդատվություն: Նմանատիպ տոնավաճառների մասնակցել ենք մի քանի անգամ: Այսօր վերցնում ենք աշխատանք փնտրող մարդկանց տվյալները, որոնք կտպենք և կբաժանենք գործատուներին»,- ասաց կազմակերպության ներկայացուցիչը: Աշխատանքի  տոնավաճառին մասնակցում էր 34 գործատու` Հրազդանի տարածաշրջանում` 39 առկա և 37 սպասվող թափուր աշխատատեղերով: Գործատուների մեջ կային նաև ներկայացուցիչներ Աբովյանի, Չարենցավանի և Եղվարդի տարածաշրջաններից: Լուսինե Դալլաքյան  (ԵՊՀ, Ժուռնալիստիկայի ֆակուլտետ)