Տեսանյութեր
Լուսանկարներ
Բանակցային գործընթացի շարունակում` նոր սկզբունքների որդեգրմամբ
ՀՅԴ Արցախի կենտրոնական կոմիտեի ներկայացուցիչ Դավիթ Իշխանյանը ԵԱՀԿ Մինսկի խմբի համանախագահ երկրների պատվիրակությունների ղեկավարների եւ Ադրբեջանի ու Հայաստանի արտաքին գործերի նախարարների դեկտեմբերի 1-ին հրապարակած համատեղ հայտարարությանը մեծ լրջություն չի տալիս եւ այն որակում է որպես տարեվերջյան ամփոփիչ հայտարարություն:
Դավիթ Իշխանյանը, սակայն, վտանգավոր է համարում այն հիմնարար սկզբունքները, որոնց մասին խոսվում է հայտարարության մեջ:
Խոսքը բանակցային գործընթացում ի հայտ եկած մադրիդյան սկզբունքների մասին է, որոնք, ըստ նրա, իրենց համար անցանկալի սկզբունքներ են: «Մեզ համար ցանկալի տարբերակը Մինսկի խմբի շրջանակներում բանակցային գործընթացի շարունակումն է, բայց` նոր սկզբունքների որդեգրմամբ»,-«Հետքին» տված հարցազրույցում շեշտեց Դ. Իշխանյանը:
Համենայնդեպս, ըստ նրա, եզրափակելով տարին` ականատես եղանք, որ բանակցային գործընթացում կանխատեսվող հաջողություններ չեղան: Իսկ հայտարարության մեջ նշված հիմնարար սկզբունքների դրույթների շուրջ ընդհանուր ըմբռնումների մասին հարցին ի պատասխան ՀՅԴ ներկայացուցիչը ընդգծեց, որ հիմնախնդրի վերջնական լուծումն առանց ԼՂՀ մասնակցության հնարավոր չէ: «Մեկ անգամ եւս կրկնեմ, որ Ղարաբաղյան հիմնախնդրի լուծման բանալին գտնվում է Ղարաբաղում»,-հավելել է նա:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել