«Հետքը» գրել էր, որ Էջմիածնի հիվանդանոցի տնօրենը մանկական բաժանմունքի ամբուլատոր հիվանդների համար գնացուցակ էր կազմել, այն հաստատել կնիքով եւ փակցրել պատին: Մինչդեռ Կառավարության մարտի 27-ի N276-Ն որոշման համաձայն` մինչեւ 7 տարեկան երեխաների բուժսպասարկումն անվճար է: (Տես հոդվածը` Էջմիածնում մինչեւ 7 տարեկան հիվանդ երեխաները սպասարկվում են վճարովի հիմունքներով): Էջմիածնի հիվանդանոցի տնօրեն Վաչագան Մկրտչյանը կառավարւթյան որոշմանը հակասող գործունեություն ծավալելը եւ հիվանդ երեխաների ծնողներից գումարներ վերցնելը պատճառաբանել էր, թե «իր իմանալով` ամբուլատոր սպասարկումը վճարովի է, անվճար է միայն ստացիոնար բուժումը»: Արմավիրի մարզպետի տեղակալ Լարիսա Մուրադյանը մեզ փոխանցեց, որ «Հետքի» հոդվածից հետո զեկուցագիր է հանձնել մարզպետին: «Մարզպետն էլ գրավոր նախազգուշացում է տվել տնօրենին: Այդ թեմայով խորհրդակցություն ենք արել եւ բոլոր հիվանդանոցների տնօրեններին զգուշացրել ենք, որ կպատժվեն, եթե ինքնագլուխ գործունեություն ծավալեն»,- ասաց Լ. Մուրադյանը: Մարզպետի տեղակալը նաեւ ասաց, որ փոխվել է տնօրենի կազմած գնացուցակը եւ մինչեւ 7 տարեկաններն այժմ կարող են օգտվել անվճար բուժսպասարկում ստանալու իրավունքից: