Այսօր Ազգային ժողովի պաշտպանության, ազգային անվտանգության եւ ներքին գործերի մշտական հանձնաժողովի նախագահ, պատգամավոր Հրայր Կարապետյանի նախաձեռնությամբ աշխատանքային հանդիպում էր կազմակերպվել:

Հրայր Կարապետյանը  «Հետքի» հետ զրույցում ասաց, որ իր հրավիրած քննարկմանը մասնակցել են պատգամավորներ, պաշտպանության նախարարության տարբեր ծառայությունների ղեկավարներ, նախարարության քննչական ծառայության ղեկավարը, իրավապաշտպան հասարակական կազմակերպությունների ներկայացուցիչներ, մարդու իրավունքների պաշտպանի գրասենյակի, ԵԱՀԿ-ի երեւանյան գրասենյակի ներկայացուցիչներ եւ այլն: «Քննարկում էինք  բանակում նկատվող մտահոգիչ խնդիրները եւ դրանց վերաբերող կանխարգելիչ միջոցառումների ընթացքը, ինչպես նաեւ օրենսդրական լուծումների հարցը»,-ասաց Հ. Կարապետյանը

Նրա խոսքով՝ որեւէ որոշում կամ նմանատիպ փաստաթուղթ ներկաները չեն ստորագրել ու հրապարակել: «Պարզապես հավաքվել, քննարկում էինք ստեղծված իրավիճակը»,-ավելացրեց Հրայր Կարապետյանը:

Պատգամավորն ասաց, որ վաղը ասուլիս է հրավիրելու, որի ժամանակ էլ կասի վերջին օրերին բանակում սպանությունների վերաբերյալ իր կարծիքը: