Բերդ քաղաքում քաղաքականությունը գրեթե բացակայում է: Հայ-թուրքական հարաբերություններ, Ղարաբաղյան հիմնահարց, ընդդիմություն-իշխանություն հակամարտություն. այս ամենն անցնում է շամշադինցիների կողքով եւ նրանց առանձնապես չի հուզում: Մարդկանց մեծամասնությունը զբաղված է առօրյա հոգսերով, օրվա հացը հայթայթելով, իսկ քաղաքական կուսակցությունների տեղական գրասենյակներում ապաքաղաքական մթնոլորտ է տիրում:

Բերդի բնակիչների հետ զրույցից պարզվեց, որ ընդդիմադիր կուսակցությունները գրասենյակներ չունեն քաղաքում, իսկ «Օրինաց երկրի» ադնամները հիմնականում ավտոկայանում են հավաքվում: «Տրանսպորտի նախարարը որ ՕԵԿ-ից ա, ավտոկայանի աշխատողներն էլ են իրանց մարդիկ»,- ասում են շամշադինցիները:

Հայ Յեղափոխական Դաշնակցությունը բավականին ընդարձակ տարածք է զբաղեցնում Բերդում, սակայն մեր այցելության օրերին (կիրակի եւ երկուշաբթի) այն փակ էր: Հարեւանությամբ գտնվող կրպակի վաճառողն ասաց, թե դաշնակցականներն ամեն օր չեն աշխատում. «Երբ ուզում գալիս են»:

Հայաստանի Հանրապետական կուսակցության եւ Երկրապահների գրասենյակը տեղակայված է քաղաքի կենտրոնում գտնվող ամայի շենքում: Շենքի բոլոր դռները բաց էին, սակայն ոչ կուսակցականներ կային, ոչ էլ` գույք: Միայն գրությունն ու կուսակցական դրոշն էր հուշում ՀՀԿ-ի գոյության մասին: Կուսակցության շենքում մի ընդարձակ սենյակ կար` «Վետերանների խաղասենյակ» գրությամբ: Սա եւս դատարկ էր: Հանրապետականի չգործող գրասենյակից ոչ հեռու գտնվում էր ՀՀԿ-ի կոալիցիոն գործընկերոջ` «Բարգավաճ Հայաստանի» տարածքային գրասենյակը:

«Պատսպարվելով Ծառուկյանի մոտ` ես այս տարածաշրջանը նրա հովանու տակ գցելու հույս եմ փայփայել»

Բերդ քաղաքում «Բարգավաճ Հայաստան» կուսակցության տարածքային գրասենյակի ղեկավար Նինա Ադամյանի հետ հարցազրույցը եւս ամբողջությամբ քաղաքական չէր, քանի որ նա զրույցի մեծ մասը նվիրեց Գագիկ Ծառուկյանի կատարած աշխատանքները ներկայացնելուն: «2006 թվականին, երբ ստեղծվեց «Բարգավաճ Հայաստան» կուսակցությունը, այստեղ հիմնեցին տարածքային գրասենյակ, ես էլ այդ օրից ղեկավարն եմ: Ես գիտեի պարոն Ծառուկյանի վարքագծի, նրա ամեն ինչի մասին եւ սատարեցի նրան: Ես շատ-շատ նվիրված եմ այդ կուսակցությանը, համատեղում եմ իմ աշխատանքը կուսակցական գործունեության հետ, բայց նույնիսկ պատրաստ եմ թողնել այն կուսակցության համար, եթե անհրաժեշտ լինի: Սա Ծառուկյանի կերպարով է պայմանավորված, նա շատ արտակարգ անձնավորություն է եւ իր շուրջն էլ հավաքված են այնպիսի մարդիկ, որոնք շատ բանիմաց, խելացի ու կազմակերպված են, ամեն ինչը տեղը տեղին, չափի մեջ է»:

Նինա Ադամյանը կուսակցական գործունեության միջոցով փորձում է օգտակար լինել Շամշադինի համայնքների բնակիչներին:

«Ես հույսս կապել եմ պարոն Ծառուկյանի հետ` որպես լավ մարդու եւ որպես կուսակցության լիդերի: Ոնց որ երեխային ծեծեն, գնա ծնողի մոտ` պատսպարվելու, ես ուժեղ անձնավորություն եմ, բայց պիտի վազեի պատսպարվելու մի մեծ լիդերի, մի մեծ կուսակցության ետեւում, եւ պատսպարվելով նրանց մոտ` ես այս տարածաշրջանը նրա հովանու տակ գցելու հույս եմ փայփայել,- խոստովանում է տիկին Ադամյանը,- երբ հեռուստաընկերությամբ ռեկլամում են, որ պարոն Ծառուկյանը այսքան բան է արել, բոլորը հիանում են, եւ անկախ ամեն ինչից` մարդիկ նրա շուրջն են հավաքվում: Նա արդեն հասել է սահմանամերձ այն գյուղերին, որոնք նրա կարիքը զգում են: Հիմա կասեն` Ծառուկյանը ունի, անում է: Ոչ: Ոչ մեկը ավելորդ գումար չի ունենում, ինչի ուրիշները չունե՞ն, շատերն ունեն, բայց Ծառուկյանը երբեք չի տեսնի, որ սոված մարդ իր կողքը կանգնի, նրան ձեռք կմեկնի: Այդ մարդու մոտ պետք է բոլորս հավաքվենք»:

Նինա Ադամյանը մանրամասն ներկայացրեց, թե Գագիկ Ծառուկյանն ինչ օգնություն է տրամադրել սահմաներձ համայնքներին:

«Դուք հեռուստատեսությամբ երեւի տեսնում եք, թե ինչքան մարդ է իր ետեւից գնում, նույնն էլ այստեղ է: Չէ՞ որ մարդիկ նստած նայում են, որ Վանուշ Խանամիրյանին 10 հազ. դոլար տվեց, որ նա միայն իր ծերությունն անցկացնի, ո՞ր մեկը 1000 դոլար կամ 100 դրամ տվեց, ասեց` էս մարդը Հայաստանի մշակույթն է զարգացրել: Որքան գեղեցիկ է, որ «Գագիկ Ծառուկյան» հիմնադրամն է օգնում մեր մարզիկներին, ճիշտ է` կարող է ինքը նյութապես մի քիչ ընկճվի, բայց ուրախանում է, որ կարողանում է օգտակար լինել բոլորին»: Ծառուկյանին իր գոհունակությունը հայտնելուց հետո տիկին Ադամյանն անդրադարձավ նաեւ քաղաքական հարցերին: «Ես դեմ եմ այդքան շատ կուսակցություններին Հայաստանում, որովհետեւ ոչ մեկը հային հայեցի պահպանելու միտում չունի: Հազվագյուտ կուսակցություններ ունեն, բոլորը աթոռակռիվ են անում: Մենք Ադրբեջանի հետ պրոբլեմ ենք ունեցել, Ղարաբաղի համար արյուն ենք թափում, իսկ հիմա ո՞ւմ համար, ինչի՞ համար կռվենք»,- հարցնում է պատերազմին մասնակցած կինը: Նրա խոսքով` մյուս կուսակցություններն օգտագործում են վարչական լծակները` ընտրություններին ձայներ ապահովելու համար:

«Յուրաքանչյուր ընտրությունից հետո խառնվում են, կռվում են, աշխատանքային լծակները օգտագործելով` բոլորին ստիպում են, որ քվեարկեն, իսկ էն ավելը ձեռքին փողոց մաքրողն էլ վախենում է, որ աշխատանքից կզրկվի: Մենք նման բաներ չենք անում, չենք կաշառում ժողովրդին, չենք տալիս 2 կոպեկ` ասենք էսօր կուտես, վաղը սոված կնստես, մենք ուզում ենք երկիր կառուցել, պետականությունը պահպանել, մենք աթոռակռիվ չենք անում: Քաղաքականությունը մաքրություն է սիրում, հակառակն են ասում, բայց ես դեմ եմ, հակառակ պատկերը ներկայացնելով` իրենց են ներկայացնում»,- ասում է կուսակցության տարածքային գրասենյակի ղեկավարը: Հայ-թուրքական արձանագրությունների վերաբերյալ Բերդ քաղաքում «Բարգավաճ Հայաստանը» քննարկում է կազմակերպել. տեղի կուսակցականները հավանության են արժանացրել Գագիկ Ծառուկյանի դիրքորոշումը:

«Մենք պաշտպանում ենք պարոն Ծառուկյանի թեզը, կարելի է հայ-թուրքական սահմանը բացել առանց նախապայմանների: Ես չեմ կարող ուրիշի խոսքը կրկնել, ես արձանագրություններում նախապայմաններ չեմ տեսել: Սահմանը պետք է բացել, բայց բացելու համար մենք կաշառք չենք տալիս, այն էլ ինչպիսի~ կաշառք. երբեք: Մեր կուսակցությունը նման քայլ չի կատարի»,- վստահեցնում է Նինա Ադամյանը: